اسلامي امارت د افغانستان د ژورنالېستانو او رسنيزو بنسټونو د فدراسیون خبري غونډه لغوه کړه

ټاکل شوې وه نن د افغانستان د رسنیو او د خبریالانو بنسټونو فدراسیون له‌خوا په هېواد کې د خبریالانو او د رسنیو وضعیت په اړه یوه غونډه جوړه کړي، خو د یاد فدراسیون غړي وايي چې د ناستې د جوړېدو اجازه نه ده ورکړل شوې او د اسلامي امارت مسوولانو دغه غونډه لغوه کړه.

د ناروې په بلنه د اسلامي امارت یو پلاوی دغه هېواد ته روان شوی

د بهرنیو چارو سرپرست وزیر امیرخان متقي په مشري د اسلامي امارت یو لوړپوړی پلاوی د ناروې په رسمي بلنه دغه هېواد ته روان شوی دی. د رپوټونو له مخې، د امریکا او ناروې استازي او د اسلامي امارت چارواکي او یو‌شمېر مدني فعالان به د ناروې په اوسلو غونډه کې ګډون وکړي.

ملګري ملتونه په ۲۰۲۲ کې ۲۸میلیونه اړمنو افغانانو ته پنځه میلیارډه ډالر راټولوي

ټاکل شوې چې نن د ملګرو ملتونو دوه ادارې په افغانستان کې دننه افغانانو ته د بشري مرستو رسولو او د سیمې په یوشمېر هېوادونو کې د بې‌ځایه شویو افغان کډوالو وضعیت ته د رسېدنې په موخه خپل ګډ پلانونه اعلان کړي. دغه سازمان ویلي، افغانستان کې د  لومړنیو روغتیايي خدمتونو د نه‌شتون له کبله، په لسګونه زره ماشومان پر خوارځواکۍ اخته شوي دي.

د سلام‌وطندار په نوښت «د ولایتي راډ‌یوګانو د فرصتونو او ننګونو د ارزونې» غونډه جوړه شوه

د سلام‌ افغانستان راډیويي موسسې «سلام‌وطندار راډیو» په نوښت نن کابل کې د ولایتي راډیوګانو د مسوولانو سربېره د اسلامي امارت د یوشمېر چارواکو په شتون کې د «ولایتي راډیوګانو د فرصتونو او ننګونو د ارزونې» تر سرلیک لاندې غونډه جوړه کړې وه. په دغه غونډه کې د محلي راډیوګانو پر ستونزو او ننګونو خبرې وشوې.

فضل الرحمان: پاکستان د خپلو ناسمو تګلارو له امله سقوط ته نږدې شوی

 د پاکستان د جمعیت علما اسلام ګوند مشر وايي چې د پاکستان اقتصادي وضعیت ته په کتو ښايي دغه هېواد له اقتصادي پلوه ډېر ژر سقوط وکړي. مولانا فضل الرحمان زیاته کړې چې د حکومت ناسمو تګلارو د دغه هېواد د اقتصاد د غوړولو مخه نیولې او که چېرته دغه وضعیت همداسې دوام وکړي، نو ډېر ژر به دغه هېواد له اقتصادي اړخه وپاشل شي.

پاکستان نن د افغانستان په اړه د اسلامي همکاریو سازمان د غونډې کوربه‌ دی

د اسلامي همکاریو سازمان د غړو هېوادونو د بهرنیو چارو وزیرانو غونډه نن د پاکستان په پلازمېنه اسلام‌اباد کې د امریکا، اروپایي ټولنې او یو‌شمیر نورو هېوادونو د استازیو په ګډون جوړه شوه. دې غونډې ته د پاکستان لومړي وزیر عمران خان وویل، اسلامي او د نړۍ نور هېوادونه باید له افغانستان سره مرستې جاري وساتي، څو د بشري ناورین مخه ونیول شي.

د اسلامي همکاریو سازمان: افغانستان زمونږ بشپړ ملاتړ ته اړتیا لري

د اسلامي همکاریو سازمان د غړو هېوادونو د بهرنیو چارو وزیرانو د افغانستان په اړه د خپلې اوولسمې ناستې د جوړېدو په درشل کې ویلي، افغانستان د دغه سازمان د غړو هېوادونو بشپړ ملاتړ ته اړتیا لري. دغه سازمان له خپلو غړو او نورو هېوادونو غوښتي چې د افغانانو د ملاتړ لپاره مالي سرچینې او د بېړنیو مرستو د رسولو په برخه کې خپل پروګرامونه بسیج کړي.

بریټانیا له افغانستان سره ۷۵ میلیونه پونډه مرسته کوي

 د بریټانیې د بهرنیو چارو وزارت اعلان کړی چې دغه هېواد له افغانستان سره ۷۵ میلیون پونډ چې ۹۹ میلیونه امریکایي ډالر کېږي، مرسته کوي. د بریټانیې د بهرنیو چارو وزیرې لیز ټراس د جي۷ هېوادونو غونډې ته په خپلې وینا کې ویلي چې د «بېړنیو مرستو» دغه کڅوړه د افغانستان خلکو ته د خوراکي توکو، روغتيايي خدمتونو، سرپناه او اوبو د برابرولو لپاره په نظر کې نیول شوې ده.

امریکا: د افغانستان په وضعیت پوهېږو، خو خپل شرایط لرو

د افغانستان لپاره د امریکا د بهرنیو چارو وزارت ځانګړي استازي ټوماس ویسټ ویلي، که څه هم په افغانستان کې د روان وضعیت په اړه پوهېږئ، خو تر هغه یې چې شرایط نه وي منل شوي، اسلامي امارت به په رسمیت ونه پېژني. ویسټ ټینګار کړی چې اسلامي امارت باید پر خپلو ژمنو عمل وکړي او امریکا هم باید په دې اړه ډاډ ترلاسه کړي.

د افغانستان اقتصادي نظام د پاشل‌کېدو په اړه د کډوالو عالي کمېشنرۍ خبرداری

د کډوالو په چارو کې د ملګرو ملتونو عالي کمېشنري په افغانستان کې د وروستیو تحولاتو له امله د دغه هېواد د اقتصادي نظام له پاشل‌کېدو څخه خبرداری ورکړی. د دغه بنسټ غړي فلیپو ګرانډي د جېنوا په یوې انلاین غوڼده کې ویلي چې په افغانستان کې د اقتصادي بې‌ثباتۍ له امله ګڼ‌شمېر افغانان کډوالۍ ته اړ شوي دي.

شنونکي: پاکستان کې د اسلامي همکاریو سازمان غونډه به هیله بښوونکې نه وي

د پاکستان د بهرنیو چارو وزیر شاه‌ محمود قریشي پرون وویل چې د افغانستان په اړه د اسلامي همکاریو سازمان غونډه د سعودي عربستان په بلنه د پاکستان په کوربه‌توب جوړېږي. قریشی ویلي چې ټاکل شوې دغه غونډه په افغانستان کې د خراب بشري وضعیت او اقتصادي ناورین څخه د مخنیوي لپاره جوړه شي.

شنونکي: د اسلامي همکاریو سازمان غونډه د افغانستان لپاره ګټوره ده

سعودي عربستان پرون د اسلامي همکاریو له سازمان څخه وغوښتل چې افغانستان کې د روان وضعیت ارزولو، بشري مرستو او ځینو نورو مسایلو په اړه بیړنۍ غونډه جوړه کړي چې پاکستان یې هم کوربه‌توب ته چمتوالی ښودلی. د چارو یو‌شمېر شنونکي د دې غونډې جوړېدل د افغانستان په ګټه بولي.

د ازبکستان بهرنیو چارو وزیر: نړیوال اېتلاف د افغانستان د وضعیت مسوول دی

د ازبکستان د بهرنیو چارو وزیر عبدالعزیز کاملوف پرون ورځ بروکسیل کې د اروپایي ټولنې چارواکو سره د لیدنې پرمهال ویلي، افغانستان کې د اوسني وضعیت او د هر ډول رامنځ ته کېدونکي ناورین مسوول د هغه نړیوال اېتلاف غړي هېوادونه دي چې افغانستان کې ښکېل وو.