نن د کب میاشتې ۲۷مه په افغانستان کې د خبریال ملي ورځې سره برابره ده. یوشمېر هغه خبریالان چې هېواد کې د ا.ا له واکمنېدو وروسته یې دندې له لاسه ورکړي، شکایت کوي چې له سختو اروايي او اقتصادي ستونزو سره لاس او ګرېوان دي.
د افغانستان د ازادو رسنیو د ملاتړ ټولنه یا نی وايي، هېواد کې یې د ا.ا د واکمنېدو راهیسې د خبریالانو پر وړاندې د تاوتریخوالي ۲۸۶ پېښې ثبت کړي چې ۳۰ هغه یې په وروستۍ نږدې یوه میاشت کې ثبت شوې دي. د خبریالانو پر وړاندې د تاوتریخوالي ډېرې پېښې د هغوی د وهلو ډبولو، سپکاوي او په خپل سره د نیولو او بندي کولو دي.
نن د کب اووهویشتمه، د شنبې ورځ د خبریال ملي ورځ ده. د افغانستان د ازادو رسنیو د ملاتړ ټولنې یا نی د دې ورځې په مناسبت یوه خبرپاڼه کې لیکلي چې ورځ تر بلې د خبریالانو پر وړاندې تاوتریخوالی ډېرېږي. نی ویلي، سږ کال د خبریال ملي ورځ داسې مهال را ورسېده چې افغان خبریالانو له سختو ستونزو او ننګونو سره لاس او ګرېوان دي.
د بېپولې خبریالانو سازمان (اراېساف) د افغانيالاصله فرانسوي خبریال مرتضی بهبودي له نیونې د اندېښنې په څرګندولو سره له ملګروملتونو د نوموړي د خوشېکېدو برخه کې د مرستې غوښتنه کړې ده. په همدې حال کې یوشمېر خبریالان وايي چې له تاوتریخوالي څخه د ځان ساتنې په موخه «خودسانسوري» ته اړ شوي دي.
د افغانستان د ازادو رسنیو د ملاتړ ټولنه یا نی وايي، افغان خبریال مرتضی بهبودي چې د فرانسې تابعیت یې اخیستی او بېرته هېواد ته را ستون شوی و، د جنوري له پنځمې نېټې راهیسې ورک شوی دی. د نی مسوول ظریف کریمي وايي، که څه هم د ا.ا امنیتي ادارې یې په دې اړه خبرې کړي، خو هغوی ناخبري ښيي.
په کاپيسا کې د پژواک خبري اژانس محلي خبريال عبدالحنان محمدي چې له څلورو مياشتو راهيسې د اسلامي امارت د استخباراتو په زندان کې و، نن خوشې شوی دی.
د اطلاعاتو او فرهنګ وزارت سرپرست خیرالله خیرخواه وايي چې د تېر یوه کال پرمهال افغانستان کې د هېڅ خبریال د وژنې پېښه نه ده ثبت شوې.
په فاریاب کې د سلاموطندار خبریال علاءالدین ایرکین وایي، د ا.ا د استخباراتو له دوه ساعته بند وروسته خوشې شوی دی.
په فاریاب کې د تمنا راډیو مسوول فېروز غفوري وايي، د طلحه په نوم د دغه ولایت د استخباراتو مرستیال له څو نورو ځواکونو سره نن سهار لس نیمې بجې د سلاموطندار خبریال علاوالدین ایرکین د ده له دفتره بیولی دی. غفوري وايي، څو دقیقې وروسته د طلحه په نوم د فاریاب د استخباراتو مرستیال له څو ځواکونو سره د ده دفتر ته ورغلی او د سلاموطندار خبریال یې له ځان سره بیولی دی. .
د افغان خبریالانو د خوندېتوب کمېټې له اسلامي امارت څخه غوښتنه کړې چې په غور کې د یادې کمېټې ولایتي همکار غلام رباني هدفمند ژر تر ژره خوشې کړي.
د سلاموطندار خبریال سرور هاشمي چې نن کابل ښار کې د پوهنې وزارت مخته د ښځو د یوه اعتراض د خبري پوښښ لپاره ورغلي و، د اسلامي امارت د استخباراتو له لوري نیول شوی و چې له شپږ ساعت بند وروسته یې بېرته خوشې کړی دی. سرور هاشمي وايي چې په پوهنې وزارت کې شپږ ساعته تر پوښتنو او ګروېګنو لاندې و.
د افغانستان د ژورنالېستانو او رسنیزو بنسټونو فدراسیون وايي، د اسلامي امارت له لوري د طلوع نیوز د درېوو کارکوونکو نیونه ناقانونه عمل دی. د یاد بنسټ په خبرپاڼه کې راغلي، په داسې حال کې چې نن د خبریال ملي ورځ ده، خو بهرام امان په زندان کې دی او خبریال باید خپله ورځ په زندان کې ونه نمانځي.
د افغانستان د ژورنالیستانو او رسنیزو بنسټونو فدراسیون د خبریال ملي ورځې په ویاړ د څه باندې ۴۰۰ خبریالانو او د رسنیو کارکوونکو له ډلې ۲۰ هغه په بېلابېلو کټګوریو کې د کال د غوره خبریال او د رسنیو کارکوونکو په توګه ونومول چې د یوې رقابتي پروسې له لارې یې نوملیکنه کړې وه او پهکې بریالي شوي وو.
د کندوز د ملي ټلویزیون خبریال سیدحکیم حکیمي په خپل فېسبوکپاڼه لیکلي چې د بېوزلۍ له امله یې د خپل د کور توکو پلور ته مخه کړې، څو ژوندی پاتې شي. حکیمي په خپل فېسبوکپاڼه لیکلي، د اسلامي امارت له راتګ وروسته دا لومړی ځل دی چې اړ شو، څو د خپلې کورنۍ لپاره د خوراکي توکو د برابرولو لپاره د کور وسایل وپلوري.
د افغانستان د خبریالانو مرکز ویلي، د کابل په لوېدیځ د دشت برچي د «کولایی مهتابقلعه» سیمې په پرونۍ چاودنه کې د اریانانیوز ټلویزیون پخوانی کارکوونکی حمید سیغاني وژل شوی دی. حمید سیغاني د اریانانیوز ټلویزیون د سیاسي خپرونو د ویاندې فوزیه وحدت خاوند و. مېرمن وحدت هم پر فېسبوکپاڼه د خپل خاوند د مرګ خبر تایید کړی.
سهار وختي دوه بجې له کوره خوځېږي او د مازدیګر څلور بجې د بوټو له وري سره بېرته راګرځي. ګلاحمد الماس پر هېواد د طالبانو له واکمنېدو مخکې خبریالي کوله چې په وینا یې، له بېلابېلو رسنیو سره یې د محلي خبریال په توګه کار کړی او اوس یې دنده له لاسه وتلې ده. ګلاحمد الماس د هغو لسګونو خبریالانو له ډلې یو هغه دی چې د خبریالۍ کار یې له لاسه ورکړی او اوس د غور په قطس سیمه کې د ژمي لپاره بوټي راټولوي.
