نن د کب اووهویشتمه، د شنبې ورځ د خبریال ملي ورځ ده. د افغانستان د ازادو رسنیو د ملاتړ ټولنې یا نی د دې ورځې په مناسبت یوه خبرپاڼه کې لیکلي چې ورځ تر بلې د خبریالانو پر وړاندې تاوتریخوالی ډېرېږي.
نی ویلي، سږ کال د خبریال ملي ورځ داسې مهال را ورسېده چې افغان خبریالانو له سختو ستونزو او ننګونو سره لاس او ګرېوان دي.
د سلاموطندار پښتو فېسبوکپاڼه وڅارئ
د دغه بنسټ په وینا، نی د نږدې درېوو میاشتو په اوږدو کې د خبریالانو پر وړاندې د تاوتریخوالي نږدې ۳۰ پېښې ثبت کړې دي.
د افغانستان د ازادو رسنیو د ملاتړ ټولنه زیاتوي چې همدا تېره اوونۍ په بلخ کې د خونړۍ چاودنې پر مهال دوه خبریالانو خپل ژوند له لاسه ورکړ او ۱۶ نور ټپیان شول.
نی وايي، ورځ تر بلې په افغانستان کې ژورنالېسټیکي کار سختېږي او د لا ترینګلي کېدو خوا ته روان دی. نی ټینګار کړی چې ګڼشمېر رسنیو د شته ننګونو او اقتصادي ستونزو له کبله خپل فعالیتونه پریښي او سلګونه خبریالان یې له کبله وزګاره شوي یا یې هم هېواد پريښی دی.
یاد بنسټ زیاتوي: «د ۲۰۲۳ زېږدیز کال پیل د رسنیو، خبریالانو او رسنیز کار لپاره له ننګونو ډک و. تر اوسه د دغه کال پیل دی، خو موږ د خبریالانو پر وړاندې د تاوتریخوالي زیاتېدو شاهدان یوو.»
د افغانستان د ازادو رسنیو د ملاتړ ټولنې له مسوولو چارواکو غوښتي چې افغانستان کې رسنیزو فعالیتونو او د بیان ازادۍ ته درناوی وکړي «او پرې نږدي چې اوسنۍ نیمبنده د بیان ازادي تر دې نور زیان وویني.»
نی ویلي چې د کب اووهویشتمه یا د خبریال ملي ورځ د افغانستان په کالیزه کې شته او هر کال په هېواد کې نمانځل کېږي. دغه بنسټ د دې ورځې په مناسبت د افغان رسنیز ډګر غړیو ته د بریا هیله څرګنده کړې ده.
