د سارک خبریالانو ټولنې په یوه خبرپاڼه کې د سارک له غړیو هېوادونو، په ځانګړې توګه پاکستان څخه غوښتي چې هلته د ورغلیو افغان خبریالانو لاسنیوی وکړي.
د سارک خبریالانو ټولنې په دې خبرپاڼه کې په افغانستان او له هېواده د بهر افغان خبریالانو ملاتړ کړی او زیاته کړې یې ده چې د سارک غړي هېوادونه باید پر افغان خبریالانو د فشار راوړلو پر ځای، هغوی خوندي او ملاتړ یې وکړي.
د سلاموطندار پښتو فېسبوکپاڼه وڅارئ
افغانستان، بنګلهدېش، پاکستان، نیپال، هند، سریلانکا، بوتان او مالدیف د سارک غړي هېوادونه دي او د سارک خبریالانو ټولنه هم په دغو هېوادونو کې څانګې لري.
د سارک خبریالانو ټولنې په وینا، دا ټولنه به د پاکستان له حکومت سره هلته د ورغلیو افغان خبریالانو د ستونزو حل په موخه نه یوازې خبرې وکړي، بلکې د حل لپاره به یې لازم اقدامات هم وکړي.
دې ټولنې پر اسلامي امارت هم غږ کړی چې د افغان خبریالانو لپاره د ازاد فعالیت اسانتیاوې برابرې او اجازه ورکړي چې په خلاص لاس خپل رسنیز کار ته دوام ورکړي.
د سارک خبریالانو ټولنې د یکشنبې په ورځ د افغان خبریالانو د وضعیت په اړه د ۸ هېوادونو د استازیو په ګډون انلاین غونډه جوړه او نه یوازې په افغانستان، بلکې د سارک په غړیو هېوادونو کې یې هم د افغان خبریالانو پر ستونزو او د حل لاروچارو خبرې وکړې.
د سارک خبریالانو ټولنې د افغانستان څانګې مشر ګلمحمد ګران چې دې انلاین غونډه کې یې ګډون کړی و، له دې ټولنې او د سارک له غړیو هېوادونو یې وغوښتل چې نه یوازې په افغانستان، بلکې د سیمې هېوادونو، په تېره پاکستان کې هم افغان خبریالانو ته لاس ورکړي او ملاتړ یې وکړي.
د سارک خبریالانو ټولنې تر دې ناستې وروسته نن دوشنبه د ملګرو ملتونو سازمان ته هم یو پرانېستی لیک لېږلی او ترې غوښتي یې دي چې افغان خبریالان هېر نه کړي او د سارک غړیو هېوادونو پر حکومتونو فشار راوړي، څو په خپلو هېوادونو کې د افغان خبریالانو ستونزې حل کړي.
