وېلسن: امریکا به په افغانستان کې د سولې راتلو لپاره هڅې ونه سپموي

د امریکا یوه مهم ډیپلوماټ له سلام‌وطندار سره په ځانګړې مرکه کې ویلي، که څه هم په ولسوالیو کې طالبانو پرمختګ کړی، خو واشنګټن به په افغانستان کې د سولې راتلو لپاره خپلې هڅې ونه سپموي. کابل کې د امریکا سفارت سرپرست وايي، د افغان دولت او طالبانو ترمنځ د سولې بهیر ګړندي کېدو په موخه به راتلونکې اوونۍ د قطر په دوحه کې غونډه جوړه شي.

د طالبانو پر ضد د «الله اکبر» نارې په کابل او یوشمېر نورو ولایتونو کې شور جوړ کړ

له هرات وروسته د کابل، خوست، تخار، ننګرهار او بدخشان ولایتونو ډېری اوسېدونکو د افغان ځواکونو په ننګه او له طالب ډلې د کرکې په موخه د «الله اکبر» نارې وکړې. خلک داسې مهال واټونو ته راووتل چې په یوشمېر ولایتونو کې جګړې زور اخیستی او طالبانو د څو ولایتونو په ښارونو کې د جګړې سنګر تود ساتلی دی.

د شبرغان د نیولو لپاره د پاکستاني متقاعد جنرال پلان ناکام شو

د ۲۰۹ شاهین قول‌اردو د دویمې لوا مسوولان وايي، پاکستاني وسله‌والو له طالبانو سره یوځای غوښتل چې د جوزجان مرکز شبرغان ښار ونیسي، خو ناکام شول. د دغې قول‌اردو د دویمې لوا قوماندان عبدالغني نظامي وايي، یاد پاکستانی متقاعد جنرال شیخ مطیع‌الله نومېږي او پلان یې ور شنډ کړی دی.

ولسمشر غني او جو بایډن پر روان وضعیت او سولې ټیلیفوني خبرې کړي

ولسمشرۍ ماڼۍ د یوې خبرپاڼې په خپرولو سره ویلي چې ولسمشر محمداشرف غني له خپل امریکایي سیال جو بایډن سره ټیلیفوني خبرې کړي دي.
په خبرپاڼه کې راغلي چې ولسمشر غني پرون ماښام له بایډن سره د دواړو هېوادونو د اړیکو پر دوام  او د هېواد په روان وضعیت بحث او خبرې کړي دي.

لغمان کې هغه چارواکي نیول شوي چې الینګار ولسوالي یې طالبانو ته پريښې

د چارواکو په وینا، هغه څلور لوړرتبه مسوولان یې نیولي چې یاده ولسوالي یې د هوايي او ځمکنۍ مرستې له رسېدو سره سره طالبانو ته پرېښې ده.
د لغمان ولایت مقام په یوه خبرپاڼه کې لیکلي چې په نیول شویو کسانو کې د الینګار ولسوال قاضي حبیب‌الرحمان، سرپرست امنیه قوماندان، د ملي اردو د کنډک درستیزوال او د ملي امنیت د امر مرستیال شامل دي.

له بېګاه راهیسې د څلورو ولایتونو په مرکزونو کې جګړه روانه ده

وسله‌والو طالبانو نن سهار د کندهار ښار د دیارلسمې، اتمې، اوومې او پنځلسمې امنیتي حوزو اړوند پر یوشمیر امنیتي پوستو بریدونه وکړل چې دغه بریدونه په ځینو سیمو کې لا هم جګړه روانه ده.
دغه راز، د کندهار په ارغنداب، ډنډ او دامان ولسوالیو کې هم د وسله‌والو طالبانو د بریدونو خبرونه را رسېدلي دي.

افغان ځواکونو ته دوه حماسي سندرې ډالۍ شوې

د افغانستان د موسیقي انسټېټیوټ نن د افغان امنیتي او دفاعي ځواکونو د مبارزې ستاینې په موخه هغوی ته هغه دوه حماسي سندرې ډالۍ کړې چې تازه د دغه انسټېټیوټ له لوري جوړې شوې دي.
د افغانستان د موسیقي انسټېټیوڼ رییس احمدناصر سرمست وايي، افغانان له دغو دوو حماسي سندرو سره اشنا دي او تازه د قنبرعلي نوشاد په مشري د ارکسټر سمفوني ډلې له لوري بیا ویل شوې دي.

د تخار او غزني د مرکزونو په څنډو کې د جګړې دوام

د تخار د مرکز تالقان ښار یوشمېر اوسېدونکي وايي، بېګاه د دغه ښار پر شاوخوا سخته جګړه روانه وه او خلک د وېرې له کبله له خپلو کورونو نه شوای راوتلی.
د تالقان ښار اوسېدونکی زمری وايي، طالبانو بېګاه له څو خواوو پر دغه ښار برید کړی و او دغه ولایت ته ټولې مواصلاتي لارې تړلې دي. د نوموړي په وینا، که څه هم امنیتي ځواکونو د طالبانو پر وړاندې مبارزه وکړه، خو خلک جګړې اندېښمن کړي وو.

جو بایډن: افغان حکومت سقوط نه کوي

د امریکا ولسمشر جو بایډن وايي چې افغان حکومت سقوط نه کوي او له ځواکونو نیولې تر تجهیزاتو د نظام ساتنې لپاره ټول لازم ظرفیتونه لري. بایډن دا څرګندونې بېګاه په سپینه ماڼۍ کې د یوې خبري غونډې پر مهال کړې دي.
هغه د یوه خبریال د پوښتنې په ځواب کې ويلي چې افغان حکومت ۳۰۰ زره مجهز وسله‌وال ځواک لري او د طالب جنګیالیو شمېر هم ۷۵ زرو ته رسېږي.

د بلخ او جوزجان سلګونو اوسېدونکو د افغان ځواکونو ملاتړ وکړ

د بلخ او جوزجان سلګونو اوسېدونکو د افغان ځواکونو ملاتړ وکړ

د بلخ سلګونو اوسېدونکو او محلي چارواکو په یوه غونډه کې د افغان امنیتي او دفاعي ځواکونو ملاتړ وکړ.
د بلخ والي محمدفرهاد عظیمي په دې غونډه کې د امنیتي او دفاعي ځواکونو ترڅنګ، د خلکو پر رول او درېدو ټینګار وکړ.

په یوشمېر ولایتونو کې د جګړې دوام

د هېواد یوشمېر ولایتونه په وروستیو دوو میاشتو کې د امنیتي ځواکونو او طالبانو ترمنځ د سختو جګړو شاهدان وو. په دغو ولایتونو کې ځايي سرچینې وايي چې طالبان د پرمختګ په حال کې دي.

جوزجان کې د طالبانو پر وړاندې مبارزې ته ښځې راوتلي

د جوزجان په مرکز شبرغان ښار کې لسګونو ښځو د طالبانو پر وړاندې مبارزې ته چمتووالی ښودلی دی. دوی وايي، د هېواد، په تېره د جوزجان د دفاع لپاره به له هېڅ راز هڅو مخ ونه ګرځوي. د دغو ښځو په وینا، د هېواد، خلکو او ملي ګټو دفاع یوازې د نارینه‌وو نه، بلکې د ښځو مسوولیت هم دی او ټول باید د طالبانو پر وړاندې ودرېږو.

پروان، کاپیسا او پنجشېر کې به ۳۰ زره کسان د طالبانو پر وړاندې ودرېږي

یوشمېر جهادي مشران په هېواد کې د طالبانو له بریدونو زیاتېدو او د یوشمېر ولسوالیو له لاسه وتلو سره سم له طالبانو سره د مبارزې په موخه د خلکو د درېدو غوښتنه کړې او په تړاو یې په پروان کې له درې ورځو راهیسې پرله‌پسې غونډې شوې دي.

د ناټو سرمنشي: د کابل هوايي ډګر د ساتلو پر څرنګوالي کار کوو

د ناټو سرمنشي ینس سټولټنبرګ وايي، دغه سازمان او متحدان یې د افغانستان د ملاتړ پر دوام او د مهمو بنسټونو، په ځانګړي ډول د کابل نړیوال هوايي ډګر پر ساتلو کار کوي.
نوموړي چې نن په بروکسېل کې د ناټو د غړیو هېوادونو د مشرانو له غونډې مخکې یوې خبري غونډې ته خبرې کولې وویل، ناټو په مستقیم ډول له امریکا او ترکیې سره د کابل نړیوال هوايي ډګر د ساتلو پر څرنګوالي خبرې کوي.

لغمان کې د یوې کورنۍ پنځه غړي وژل شوي

لغمان کې پر یوه کور د هاوان مرمۍ لګېدو پېښه کې د یوه کور پنځه غړي وژل شوي او یو بل ژوبل دی.
په ختیځ کې د ملي اردو چارواکي وايي، وسله‌والو طالبانو د لغمان ولایت په الیشنګ ولسوالي کې د ولسي خلکو پر کورونو د هاوان مرمۍ ویشتي او د یوې کورنۍ پنځه غړي یې وژلي او یو بل یې ټپي کړی دی. د دوی په وینا، په پېښه کې ښځې او ماشومان هم شامل دي.