د پروان امنیتي مسوولان تاییدوي چې د سالنګ په تونل کې د اورلګېدنې له کبله ۴۷ کسانو ته مرګژوبله اوښتې ده.
مسوولانو ویلي چې بېګاه د سالنګ په تونل کې دننه یوه ټانکر اور اخیستی او له کبله یې یاده مرګژوبله رامنځته شوې ده.
د پروان د امنیې قومندان عزیزالله عمر سلاموطندار ته ویلي چې بېګاه ۸:۳۰ بجې د تېلو یو ټانکر موټر له بغلان څخه د کابل پر لور روان و چې د سالنګ تونل کې دننه یو ټانکر له «ټرک» څخه جلا شوی چې پر مهال یې اورلګېدنه رامنځته شوې.
د پروان د امنیې قومندان زیاتوي چې تراوسه دې اورلګېدنه کې ۲۲ کسان مړه شوي او ۲۵ نور ټپیان دي. د نوموړي په وینا چې ښايي د مرګژوبلې شمېره له دې هم لوړه شي.
د پروان د امنیې قومندان تاییدوي چې په مړو شویو کې ښځې او ماشومان هم شامل دي چې ډېری جسدونه د سوځېدو له امله د پېژندنې نه دي.
په ورته وخت کې د عزیزالله عمر زیاتوي چې د تېلو ټانکر د چاودنې له کبله د سالنګ تونل د چت یوه برخه هم نړېدلې ده.
نوموړي همداراز سلاموطندار ته وویل چې د سالنګ لویه لاره له دواړو خواوو تړل شوې چې اوس پر دغه لاره په سلګونه بار او مسافر وړونکي موټر ایسار پاتې دي.
بلخو د پروان د امنیې قومندان ټينګار وکړ چې د تېلو ټانکر موټر چلوونکی او کلینر یې د پروان د امنیتي ځواکونو په بند کې دي.
سلاموطندار پر ټویټر هم وڅارئ
د پېښې عیني شاهدانو سلاموطندار ته ویلي چې تونل کې د ډبرو سکرو دوه بار موټر هم ایسار دي او د اور اخیستنې احتمال یې ډېر دی.
