د روسیې د بهرنیو چارو وزارت سرګي لاوروف خبرداری ورکړی چې ښايي د اوکراین جګړه د اټومي او درېیمې نړیوالې جګړ لامل شي.
نوموړي پرون له روسیي رسنیو سره په خبرو کې ویلي چي اوسني ګواښونه د پام وړ دي او نه باید له پامه وغورځول شي، خو روسیه غواړي چې د دغې سناریو مخه ونیسي.
د سلاموطندار پښتو فېسبوکپاڼه وڅارئ
د روسیې د بهرنیو چارو وزیر، د اوکراین ولسمشر ولودیمیر زیلنسکي تورن کړ چې د سولې له خبرو سره پرېکون کړی او دې برخه کې جدي نه دی.
په همدې حال کې د اوکراین د بهرنیو چارو وزیر ډیمټري کولبا پر خپل ټویټرپاڼه لیکلي چې د روسیې دغه څرګندونې، د دې ښکارندوینه کوي چې نړۍ ووېره، څو د اوکراین له ملاتړ څخه لاس واخلي.
نوموړي زیاته کړې: «له همدې امله د درېیمې نړیوالې جګړې د پېښېدو د ګواښ خبرې کېږي. دا یوازې یوه معنی لري: دا چې مسکو احساس کوي، په اوکراین کې ماته خوري.»
دا په داسې حال کې ده چې امریکا او ملګري یې اوکراین ته د لا ډېرو پوځي تجهیزاتو د ورکړې لپاره نن یوه ناسته جوړوي.
