خانملا چې د کابل په یوه څلورلارې کې یې د مزودورۍ پیدا کولو په موخه یوه دېوال ته څنګ وهلی وايي، سهار وختي راغلی چې که څوک یې د کار لپاره بوځي او بېګاه ته یوه مړۍ ډوډۍ ومومي. هغه چې د کورنۍ سرپرستې یې پر غاړه ده وايي، په تېرو دوو کلونو کې یې پنځه ځله د بشري مرستو کڅوړې ترلاسه کړي، خو وايي چې اوس یې دغو مرستو ته اړتیا ډېره شوې ده.
نوموړی زیاتوي: «په روانو بشري مرستو مو تر یوه بریده ګوزاره کېږي. لس پنځلس ورځې مو پرې پرده کېږي. ټول خلک اوس دغو مرستو ته اړتیا لري؛ نو پهکار ده چې راکړل شي.»
د سلاموطندار پښتو فېسبوکپاڼه وڅارئ
جانعلي په کابل ښار کې یو بل کارګر دی چې بېوزلي او ناچاري یې ځوروي. هغه له نړیوالو مرستندویه بنسټونو غواړي چې د خوراکي توکو او نغدو پیسو پر ځای دې ورته د کار اسانتیاوې برابرې کړي، څو نور پرې سختې ورځې را نهشي.
نوموړی وايي: «کار باید پیدا شي چې پرې بوخت شوو. اوسنۍ مرستې لنډمهالې دي او پهکار ده چې کار زیات شي، څو هره ورځ کار وکړو. موږ هره ورځ ساعتونه د کار په تمه یوو او ډېر کله ناهیلي کورونو ته ستنېږو.»
په همدې حال کې د ملګرو ملتونو د افغانستان برخې د مرستو رسولو د همغږۍ دفتر یا اوچا اعلان کړی چې د بشري مرستو لپاره د ۱.۳ میلیارډه ډالرو بودیجې له کمښت سره مخامخ دي او همدا لامل دی چې د مرستو اخیستونکو کسانو شمېر یې له ۱۳ میلیونو څخه پنځو میلیونو ته را ټیټ شوی دی.
اوچا زیاتوي چې د اړتیاوو زیاتېدل، پرلهپسې درې کلنه وچکالي او د بېوزلۍ کچې لوړوالی هغه لاملونه دي چې یوازې تر ژمي وړاندې محدودو بېوزله افغانانو ته مرسته ورسوي.
د اقتصادي چارو شنونکی محمدشبیر بشیري بیا وايي چې د نړیوالو مرستو کمېدل به د بېوزلۍ اوسنۍ کچه نوره هم لوړه کړي. هغه زیاتوي: «په خواشینۍ سره باید ووایو چې د مرستو ختمېدل یا کمېدل به د بېوزلۍ ناورین نور هم ژور کړي؛ نو اسلامي امارت باید د کاري بوختیاوو رامنځته کولو برخه کې لاس پهکار شي.»
د یادونې ده چې له دې وړاندې د ملګرو ملتونو د ښځو برخې بنسټونو ویلي و چې د اسلامي امارت له لوري د ښځو پر کار له بندیز وروسته ۱۵۱ بنسټونو خپل فعالیتونه درولي دي. بلهخوا بریټانیا په یوه تازه خبرپاڼه کې ویلي چې په افغانستان کې د خپلو مرستو کچه ۷۶ سلنه کموي.
دا په داسې حال کې ده چې د اسلامي امارت د بیا واکمنېدو په لومړیو کې له ۲۴ میلیونه ډېرو افغانانو بشري مرستو ته اړتیا لرله، خو اوس دا شمېر له ۲۹ میلیونو څخه اوښتی دی.
