په سمنګان ولایت کې پر جهادیه مدرسې برید چې له کبله یې له ۴۰ ډېرو کسانو ته مرګژوبله واوښته، کورني او نړیوال غبرګونونه را پارولي دي. دا چاودنه پرون ماسپښین د سمنګان ولایت د مرکز ایبک ښار په جهادیه مدرسه کې د جماعت پر مهال وشوه.
د سمنګان د ولایتي روغتون رییس سیدمحمدعثمان حمیدي سلاموطندار ته ویلي چې په دې چاودنه کې د ماشومانو په ګډون، ۱۹ کسان وژل شوي او ۲۳ نور ټپیان دي.
خو د کورنیو چارو وزارت ویاند عبدالنافع ټکور پرون له دې چاودنې وروسته وویل چې په دې چاودنه کې د یادې مدرسې شاوخوا لس زدهکوونکي وژل شوي او یوشمېر نور ټپیان دي. هغه ویلي چې کشفي او امنیتي ځواکونه هڅه کوي، څو د دې پېښې عاملان په نښه او سزا ورکړي.
د افغانستان لپاره د امریکا سفارت شارزدافیرې کرن ډېکر هم نن پر ټویټر دا چاودنه غندلې او هغه یې له نفرته ډک بللې ده. هغې د افغان ماشومانو پر ساتنې ټینګار کړی او زیاته یې کړې یې ده: «موږ باید د خپلو بچیانو له ژوند نه د وحشت ريښې وباسو.»
افغانستان کې د ښځو او بشري حقونو په برخه کې د امریکا ځانګړې استازې رینا امیري هم په سمنګان کې پر جهادیه مدرسې برید «وحشیانه» بللی دی. نوموړې پر ماشومان برید د افغانستان پر راتلونکې برید بللی او د درېدو غوښتنه یې کړې ده.
د افغانستان لپاره د امریکا ځانګړي استازي ټوماس وېسټ هم دا چاودنه غندلې ده. کابل کې د ایران سفارت هم په یوه ټویټ کې دغه برید په سختو ټکو غندلی دی.
د بښنې نړیوال سازمان بیا د دغه برید د غندنې ترڅنګ، ویلي چې دغه خونړي برید نړیوالې ټولنې ته بیا ور یاده کړه چې د افغانانو دردونه او کړاوونه تراوسه پای ته نهدي رسېدلي.
بلهخوا د ملګرو ملتونو د ماشومانو د ملاتړ صندوق یا یونیسف هم په سمنګان کې پر مدرسې د شوي برید د غندنې ترڅنګ، لیکلي چې یاده چاودنه کې ماشومان وژل شوي، خو په وینا یې، تر اوسه یې شمېر نهدی تایید شوی.
یونیسف ویلي چې د روان کال په لومړۍ نیمايي کې لږترلږه ۲۸۸ افغان ماشومانو ته مرګژوبله اوښتې او په خبره یې، داسې ښکاري چې اصلي شمېرې تر دې لوړې وي.
د سلاموطندار پښتو فېسبوکپاڼه وڅارئ
د ریاستالوزرا سیاسي مرستیال مولوي عبدالکبیر هم بېګاه د دې چاودنې د غندنې ترڅنګ ویلي و چې یاد برید د ټولو اصلامي او انساني اصولو خلاف دی.
په همدې حال کې پخواني ولسمشر حامد کرزي او عبدالله عبدالله هم دغه برید غندلی او هغه یې د ټولو اسلامي او انساني ارزښتونو خلاف عمل بللی دی.
تر اوسه کوم چا یا وسلهوالې ډلې د دې چاودنې مسوولیت پر غاړه نهدی اخیستی.
