د افغانستان برښنا شرکت د یوې خبرپاڼې په خپرولو سره ویلي چې د هرات سلما بند درېیم توربین بېرته فعال شوی او په وینا یې، د دې بند د برښنا د تولید چارې عادي حالت ته راګرځېدلې دي.
د یاد شرکت د خبرپاڼې له مخې، د برښنا شرکت تخنیکي کارکوونکو د سلما بند درېیم توبین ترمیم کړی او بېرته یې د برښنا شبکه کې شامل کړی دی.
د سلاموطندار پښتو فېسبوکپاڼه وڅارئ
په ورته مهال د برښنا شرکت په خبرپاڼه کې ویل شوي چې اوس د سلما بند درېیم توربین څه باندې ۳۰ میګاواټه برښنا تولیدوي.
خبرپاڼه کاږي چې برښنا شرکت د برښنا کورنیو سرچینو څخه د ګټې اخیستنې ترڅنګ، د برښنا د تاسیساتو ساتنې او څارنې ته هم په جدي توګه پام کوي.
د برښنا شرکت په داسې حال کې د سلما بند د درېیم توربین د فعالېدو خبر ورکوي چې سږکال د هېواد په سوېلي ولایتونو کې پسرلنی باران نه دی شوی او اندېښنې دي چې وچکالي به لا هم ډېرې شي.
په وروستیو کلونو کې د هرات د سلما بند توربینونه د اوبو د کمښت له کبله د برښنا له تولید څخه پاتې وو.
