کابل کې د واژه، مقصودي او یوسفزاد خپروندویو ټولنو او کتاب پلورنځیو خاوندان وايي، سره له دې چې د فعالیتونو لپاره یې اطلاعاتو او فرهنګ وزارت څخه جواز لري، خو کابل ښاروالي دغې ادارې څخه د خدمتونو وړاندې کولو جواز نهدرلودو له امله د دوی فعالیتونه ځنډولي دي.
د دغو خپروندویو ټولنو له خاوندانو څخه سیدمحمد محمدي سلاموطندار ته وویل، اسلامي امارت په دې کار سره غواړي، کابل کې د خپروندویو ټولنو او کتاب پلورنځیو فعالیتونه بند کړي.
نوموړي وویل: «کابل ښار کې کتابپلورنځي ناسم وضعیت کې دي، د اسلامي امارت او د محدودیتونو او بېوزلۍ له امله. موږ د اطلاعاتو او فرهنګ وزارت څخه د فعالیت جواز لرو، اوس غواړي چې له ښاروالي هم د کتابونو ډېرۍ لپاره جواز واخلو. اسلامي امارت غواړي چې کابل کې د کتاب پلورونکو فعالیتونه ودروي.»
په همدې حال کې د یوې بلې خپروندویې ټولنې مسوول چې نه غواړي نوم یې رپوټ کې خپور شي، سلاموطندار ته وايي، بېوزلي، وزګارتیا او پر کتاب پلورنځیو محدودیت، هېواد کې د کتاب لوستو فرهنګ ته تر بل هر وخت زیان رسولی دی.
په ورته وخت کې د کابل ښاروالي ویاند نعمتالله بارکزی وايي، ټول اصناف باید ښاروالي څخه د ښاري خدمتونو جواز ترلاسه کړي، کنه نو فعالیت یې ځنډول کېږي.
د خپروندویو ټولنو د اتحادیې د معلوماتو پربنسټ، د هېواد په کچه ۱۸۰ چاپخونې او ۵۲۵ کتاب پلورونکي شتون لري چې له ډلې یې ۹۰ چاپخونې او شاوخوا ۲۸۰ کتاب پلورونځي یې کابل ښار کې فعالیت لري.
