بلخ کې د خبریالانو پر یوې غونډې د شوې چاودنې مسوولیت داعش ډلې پر غاړه اخیستی دی.
العربیه رسنۍ راپور ورکړی چې داعش ډلې یکشنبه د کب ۲۱مه پر خپل ټلګرام اعلان کړی چې د بلخ مرکز مزارشریف ښار اړوند د خبریالانو پر غونډې د شنبې ورځې چاودنه دوی کړې ده.
د سلاموطندار پښتو فېسبوکپاڼه وڅارئ
د یادونې وړ ده چې د شنبې پر ورځ مزارشریف ښار کې د تبیان په نوم فرهنګي مرکز کې د خبریالانو پر یوې غونډې چاودنه وشوه.
د راپورونو پر بنسټ، دې چاودنه کې د یوه خبریال په ګډون دوه کسان وژل شوي او لږ تر لږه ۱۵ خبریالان ټپیان شوي دي. د کورنیو چارو وزارت او د بلخ امنیتي مسوولانو بیا ویلي چې یاده چاودنه کې یو کس وژل شوی او اته ټپیان دي.
د بلخ پر والي محمدداوود مزمل له ځانمرګي برید دوه ورځې وروسته دغه چاودنه رامنځته کېږي. په شوي ځانمرګي برید کې د بلخ والي له دوو نورو کسانو سره یوځای وژل شوي وو.
سلاموطندار پر ټویټر هم وڅارئ
د بلخ د والي د وژنې مسوولیت هم داعش ډلې پر غاړه اخیستی و.
