په خوست کې د «زرغون افغانستان جام» تر نوم لاندې د کرېکټ یو ورځنیو سیالیو پای لوبه کې پرون هندوکش سټرایکرز لوبډله بریالۍ شوه چې پامیر لیجینډز لوبډلې ته په درېوو وېکټو ماته ورکړي او د دغه جام اتلولي خپله کړي.
په دغه لوبه کې پامیر لیجینډز لوبډلې لومړۍ توپوهنه وکړه او په ټاکل شویو ۳۳ اورونو کې یې هندوکش لوبډلې ته د ۲۰۴ منډو هدف وټاکه.
د سلاموطندار پښتو فېسبوکپاڼه وڅارئ
هندوکش لوبډلې دغه هدف د لوبې په وروستي اوور کې ترلاسه کړ او پامیر ته یې په درېوو وېکټو ماته ورکړه.
د زرغون افغانستان جام کرېکټ یو ورځنیو سیالیو پای لوبې ته د ا.ا د رییسالوزرا دویم مرستیال عبدالسلام حنفي، د کرېکټ بورډ رییس میرویس اشرف او یوشمېر نور لوړپوړي دولتي چارواکي ورغلي وو.
د کرېکټ بورډ رییس میرویس اشرف د پای لوبې مراسمو پرمهال وویل، له کرېکټ سره د خوست د اوسېدونکو د مینې له امله د کرېکټ بورډ ادارې پرېکړه وکړه چې د زرغون افغانستان جام سیالۍ خوست کې وکړي، څو د دغه ولایت اوسېدونکي له نږدې خپل اتلان وویني.
یادې سیالۍ د روانې میلادي میاشتې په اتمه نېټه پیل شوې چې درېوو لوبډلو هندوکش سټرایکرز، پامیر لیجینډز او میوند ساتونکو پهکې برخه لرله چې پرون پای ته ورسېدې.
