په کابل کې د پاکستان سفارت سرپرست عبدالرحمان نظاماني پرون د بهرنیو چارو وزارت له سرپرست امیرخان متقي سره په لیدنه کې ویلي چې د افغانستان او پاکستان اړیکې ډېرې مهمې دي.
د سلاموطندار پښتو فېسبوکپاڼه وڅارئ
د بهرنیو چارو وزارت د ویاند مرستیال ضیااحمد تکل پرون ناوخته پر اېکسپاڼې لیکلي چې په یاده لیدنه کې د افغانستان او پاکستان د سیاسي او اقتصادي موضوعاتو په اړه خبرې اترې شوې دي.
امیرخان متقي ویلي چې له افغانستان سره د سیمې هېوادونو مثبت تعامل په زیاتېدو دی او په وینا یې، سیمې درک کړې چې د افغانستان ثبات د سیمې په هراړخیز پرمختګ او نوښت کې مثبت رول ولوبوي.
هغه هیلهمندي ښودلې چې د پاکستان نوی حکومت به په خپلې مثبتې پالیسي سره د افغانستان او پاکستان ترمنځ د اړیکو پیاوړتیا برخه کې اغېزناک ګامونه اوچت کړي.
په همدې حال کې عبدالرحمان نظاماني ویلي: «د افغانستان او پاکستان اړیکې ډېرې مهمې دي او نوی حکومت د اړیکو پیاوړتیا غواړي او هڅه کوي چې د شته ستونزو د حل لپاره ګډ کار وکړي.»
ضیااحمد تکل زیاتوي چې په یاده لیدنه کې دواړو خواوو ته د مسافرو او ناروغانو د تګراتګ برخه کې د اسانتیاوو برابرولو او د ډیورنډ له فرضي کرښې څخه د سوداګریزو توکو د لېږد رالېږد پر اسانولو ټینګار شوی دی.
