د کولمبیا په امازون ځنګل کې د یوې کوچنۍ الوتکې له لوېدو ۴۰ ورځې وروسته څلور ماشومان ژوندي موندل شوي دي.
د کولمبیا پوځ او د سیمې اوسېدونکو دغه ماشومان د کاکویټا او ګوویر ولایتونو ترمنځ په امازون ځنګل کې له څه باندې پنځو اوونیو وروسته موندلي دي.
د سلاموطندار پښتو فېسبوکپاڼه وڅارئ
د سېسنا ۲۰۶ ډوله الوتکه چې اووه کسان یې لېږدول، د روان میلادي کال د مې میاشتې په لومړۍ نېټه د یادې الوتکې انجن کې د ستونزې رامنځته کېدو له امله غورځېدلې وه.
د یادې الوتکې د غورځېدو له امله دوه پیلوټان او د دغو څلور ماشومانو مور مړه شوي وو، خو ماشومان لا درکه وو. د رسنیو د راپورونو له مخې، دغه ماشومان چې عمرونه یې ۱۳، نهه، څلور او یو کلن دي، د درملنې لپاره د کولمبیا پلازمېنې بوګوتا ته لېږدول شوي دي.
د کولمبیا ولسمشر ګوستاوو پېټرو د ۴۰ ورځو وروسته د یادو ماشومانو موندل یوه «جادويي ورځ» بللې ده. نوموړي ویلي: «دوی «ماشومان» یوازې وو او د ځان ساتنې او ژغورنې لپاره یې داسې بېلګه ټينګه کړې چې تاریخ به یې یاد ساتي.»
ژغورونکو د لټون عملیاتو پر مهال ځنګل کې د ماشومانو د پلونو په څېر نورې نښې نښانې هم لیدلې وې او دوی یې دې باور ته نږدې کړي وو چې ماشومان لا هم ژوندي دي.
ویل کېږي چې دغه ځنګل د پړانګانو، مارانو او نورو ښکاري ژویو کور دی.
