د اسټرالیا په کوربهتوب د روان شل اووره نړیوال جام سیالیو په لړ کې نن د نیوزیلنډ کرېکټ ملي لوبډلې په یوې په زړهپورې لوبه کې اسټرالیا ته د ۸۹ منډو په توپیر ماته ورکړه.
په دغه سیالی کې د نیوزیلنډ کرېکټ ملي لوبډلې لومړی توپوهنه وکړه او په ټاکل شویو شلو اورونو کې یې د درېوو لوبغاړو په سوځېدو د اسټرالیا لوبډلې ته د ۲۰۱ منډو هدف وټاکه.
د نیوزیلنډ لپاره په توپوهنه کې ډېوېډ کانوې ښه وځلېد او ناسوځېدلې ۹۲ منډې یې جوړې کړې. فېن الېن هم د نیوزیلنډ لپاره په ۱۶ توپونو چټکې ۴۲ منډې وکړې.
د نیوزیلنډ د ورکړل شوي هدف په ځواب کې د اسټرالیا لوبډلې یوازې ۱۷.۱ اورونه ولوبول او ټوله لوبډلې یې په ۱۱۱ منډو وسوځېده.
د نن ورځې په دویمه سیالي کې به افغانستان د انګلستان له کرېکټ ملي لوبډلې سره لوبه وکړي.
