د جګړې د قربانیانو ملي کمېټې نن په یوه خبري غونډه کې د هېواد روان امنیتي وضعیت د اندېښنې وړ وباله او له طالبانو یې وغوښتل چې په لوی اختر کې اوربند وکړي. د جګړې د قربانیانو ملي کمېټې مرستیال حبیبالرحمان بخشي وايي، په هېواد کې وروستیو جګړو د ملکیانو او نظامیانو د مرګژوبلې کچه لوړه کړې او د طالبانو له لوري د تاوتریخوالي ډېروالی به د وضعیت لا خرابوالي لامل شي.
سره له دې چې د بادغیس د مرکز قلعهنو ښار په ځینو برخو کې د طالبانو او امنیتي ځواکونو له جګړې شاوخوا ۱۰ ورځې تېرېږي، خو په ولسي جرګه کې د دغه ولایت استازي ادعا کوي چې تر اوسه بادغیس ته مرستندویه ځواکونه نه دي لېږل شوي.
د سلما بند د ساتنې کنډک قوماندان اللهمحمد همدرد وايي، طالبانو پرون مازدیګر شاوخوا پنځه بجې دغه بند په څو هاوانونو ویشتی دی. د نوموړي په وینا، یاد هاوانونه د بند په شاوخوا کې لګېدلي دي. اللهمحمد زیاتوي، طالبان اوس د سلما بند په شاوخوا سیمو کې ځای پر ځای شوي دي. د هرات په چشت ولسوالي کې یوه باوري محلي سرچینه وايي چې په تېرو څو ورځو کې د سلما بند ځینې امنیتي پوستې د طالبانو لاس ته لوېدلې دي.
د چارواکو په وینا، هغه څلور لوړرتبه مسوولان یې نیولي چې یاده ولسوالي یې د هوايي او ځمکنۍ مرستې له رسېدو سره سره طالبانو ته پرېښې ده.
د لغمان ولایت مقام په یوه خبرپاڼه کې لیکلي چې په نیول شویو کسانو کې د الینګار ولسوال قاضي حبیبالرحمان، سرپرست امنیه قوماندان، د ملي اردو د کنډک درستیزوال او د ملي امنیت د امر مرستیال شامل دي.
ولسمشر محمد اشرف غني نن د بلخ ولایت د امنیت وضعیت د ارزونې په موخه دغه ولایت ته سفر کړی او تمه وه چې رسنۍ د نوموړي دغه سفر ته خبري پوښښ وکړي، خو په دغه ولایت کې خبریالانو ته اجازه نه ده ورکړل شوې چې د ولسمشر دغه سفر ته خبري پوښښ وکړي.
د کابل د امنیې قومانداني ویاند فردوس فرامرز وايي چې نن ماسپښین شاوخوا دوه بجې او پنځوس دقیقې د کابل ښار د لومړۍ ناحیې اړوند په میوند جاده کې چاودنه شوې ده.
د نوموړي په وینا، د لومړنیو معلوماتو پر بنسټ، په یاده چاودنه کې څلور ملکیان وژل شوي او یوولس نور ټپیان دي.
د لوګر ولایت د ولایتی شورا رئیس حسیب الله ستانګزی سلاموطندار ته وویل چې نن غرمه شاوخوا یوه بجه د خوست د ولایتي شورا او د ملي مصالحې عالي شورا غړې زهره جلال او یو ساتوونکی یې وسله والو طالبانو له موټره ښکته کړي او نامعلوم ځای ته یې بیولي دي.
طالبانو په افغانستان کې د ترکي سرتېرو د پاتې کېدو پر وړاندې مخالفت ښودلی دی. په اعلامیه کې لیکل شوي چې ترکي چارواکو د امریکا په غوښتنه او هوکړه په افغانستان کې د خپلو سرتېرو د پرېښودو پرېکړه کړې ده. دغې ډلې ویلي چې افغانستان او ترکیه مذهبي، تاریخي او کلتوري اړیکې لري او باید پر خپله پرېکړه بیاکتنه وکړي.
په فراه کې یوه امنیتي سرچینه سلاموطندار ته وایي چې پرون له غرمې وروسته د فراه ښار اړوند په «شپلکوه» سیمه کې د وسلهوالو طالبانو یوه نفوذي کس د یوې پوستې ۷ پولیس وژلي دي. د سرچینې په وینا، د وسلهوالو طالبانو دغه نفوذي کس د اوو پولیسو له وژلو وروسته، د پوستې ټول پوځي تجهیزات او وسلې له ځان سره وړي او وسلهوالو طالبانو سره یوځای شوی دی.
د جوزجان ولایت د اقچې ولسوالي اوسېدونکي وایي، وروسته له هغې چې طالبانو دغه ولسوالي تر خپلې ولکې لاندې راوسته، اوس یې د دغې سیمې پر خلکو نوي بندیزونه لګولي او عملي کول یې اجباري کړي دي.
وسلهوالو طالبانو نن سهار د کندهار ښار د دیارلسمې، اتمې، اوومې او پنځلسمې امنیتي حوزو اړوند پر یوشمیر امنیتي پوستو بریدونه وکړل چې دغه بریدونه په ځینو سیمو کې لا هم جګړه روانه ده.
دغه راز، د کندهار په ارغنداب، ډنډ او دامان ولسوالیو کې هم د وسلهوالو طالبانو د بریدونو خبرونه را رسېدلي دي.
د طالبانو له لوري د جګړې د زیاتېدو او د ولسوالیو له سقوط وروسته، د دغې ډلې تر ولکې لاندې سیمو کې پر ښځو او د دوی د ژوند پر نورو برخو طالبانو نوي قوانین او بندیزونه وضع کړي دي. د طالبانو تر کنټرول لاندې سیمو کې د نویو بندیزونو د خبرونو له خپرېدو سره هممهاله په ولسي جرګه کې د خلکو استازیو د طالبانو دغه کار ته غبرکون ښودلی دی.
د افغانستان د موسیقي انسټېټیوټ نن د افغان امنیتي او دفاعي ځواکونو د مبارزې ستاینې په موخه هغوی ته هغه دوه حماسي سندرې ډالۍ کړې چې تازه د دغه انسټېټیوټ له لوري جوړې شوې دي.
د افغانستان د موسیقي انسټېټیوڼ رییس احمدناصر سرمست وايي، افغانان له دغو دوو حماسي سندرو سره اشنا دي او تازه د قنبرعلي نوشاد په مشري د ارکسټر سمفوني ډلې له لوري بیا ویل شوې دي.
سلاموطندار ته په لاس ورغلی یو مکتوب ښيي چې د بغلان امنیه قوماندان «له طالبانو سره د امنیتي ځواکونو پر وړاندې ترهګریزو بریدونو کې» همکاري کړې ده.
په دغه مکتوب کې په نامستقیم ډول لیکل شوي چې په بغلان کې د طالبانو د استخباراتو مسوول «قاري ظاهر» په دغه ولایت کې د ترهګریزو بریدونو لپاره د بغلان له امنیه قوماندان څخه همکاري غوښتې ده.
د بامیانو ولایت محلي چارواکو نن په دغه ولایت کې د یوې خبري غونډې پرمهال وویل چې له یوې اوونۍ راهیسې د طالبانو د رواني جګړې په پایله کې د دغه ولایت اړوند د شبیر ولسوالي د «باغک» سیمه کې د جګړې د لومړۍ کرښې سرتیري له ستونزو سره مخ شوي او دغې جګړې د بامیان د اوسېدونکو اندېښنې هم زیاتې کړي دي.
د تخار د مرکز تالقان ښار یوشمېر اوسېدونکي وايي، بېګاه د دغه ښار پر شاوخوا سخته جګړه روانه وه او خلک د وېرې له کبله له خپلو کورونو نه شوای راوتلی.
د تالقان ښار اوسېدونکی زمری وايي، طالبانو بېګاه له څو خواوو پر دغه ښار برید کړی و او دغه ولایت ته ټولې مواصلاتي لارې تړلې دي. د نوموړي په وینا، که څه هم امنیتي ځواکونو د طالبانو پر وړاندې مبارزه وکړه، خو خلک جګړې اندېښمن کړي وو.
