رویټرز خبري اژانس له دوو باخبره سرچینو راپور ورکړی چې نړیوال بانک افغانستان کې د روغتیا، کرنې او د ژوند د لومړنیو اړتیاوو په برخه کې درې پروژې بېرته پیلوي، خو د پوهنې په برخه کې د نږدې ۱۵۰ میلیونه ډالرو پروژه به همداراز تړلې وي. راپور کې ویل شوي چې په دغه ناسته کې به د پیسو نړیوال صندوق، د اسلامي پراختیا بانک او افغانستان کې د ملګروملتونو استازولي یا یوناما استازي ګډون وکړي.
د کابل په لوېدیځه سیمه کې نن درېوو پرله پسې چاودنو پراخ ملي او نړیوال غبرګونونه راوپارول. په افغانستان کې د ملګرو ملتونو ځانګړې استازولۍ یا یوناما نن د یوې خبرپاڼې په خپرولو سره د کابل په لوېدیځ کې د پرله پسې چاودنو په اړه غبرګون ښودلی او هغه یې غندلې دي. دغه بنسټ عدالت ته د دغو پېښو د عاملینو د راکاږلو غوښتنه کوي.
په ملګرو ملتونو کې د افغانستان دایمي استازي پر خوست او کونړ ولایتونو د پاکستان د هوايي بریدونو په اړه امنیت شورا ته شکایت کړی دی.
د افغان ځوانانو مدني ټولنه پر خوست او کونړ ولایتونو د پاکستان هوايي بریدونو او ایران کې د افغان کډوالو پر زورونې د نیوکې په څرګندولو سره وایي چې نړیواله ټولنه دې پر دغو دوو هېوادونو بندیزونه ولګوي څو د هغوی ورته کړنې تکرار نه شي.
د اسلامي امارت مسوولانو نن په کابل کې یوې ولسي غونډه کې وویل، اسلامي امارت په بشپړه توګه یو اسلامي او د افغانستان د ولسونو د خوښې نظام دی. د اسلامي امارت یو مسوول امین وقار په دغه ناسته کې وايي، که څوک د دغه نظام پر وړاندې مبارزه وکړي، د خدای او د هغه د رسول پر وړاندې د مبارزې په معنی دی.
داعش ډلې پورې اړوند «اعماق» رسنۍ پر ازبکستاني ځواکونو د توغندیز برید تصویرونه او ویډیو خپاره کړي او ویلي یې دي چې دغه برید دوی کړی دی.
داعش ویلي، د ازبکستان او افغانستان ترمنځ ترمز سیمه کې یې پر ازبکستاني ځواکونو د «کاتیوشاه» په نوم ۱۰ راکېټونه توغولي دي.
د بهرنیو چارو وزارت په یوې خبرپاڼه کې ویلي چې د دغه وزارت سرپرست امیرخان متقي د ایران د بهرنیو چارو له وزیر حسین امیر عبداللهیان سره ټيلیفوني خبرې کړې دي.
د کابل په لوېدیځه سیمه کې سرچینو رسنیو ته ویلي، د ۱۸ امنیتي حوزې اړوند سیمه کې د «عبدالرحیم شهید» ښوونځي ته څېرمه په یوې چاودنه کې لږ تر لږه ۲۵ زدهکوونکي وژل شوي دي. دغه سیمه کې نن سهار درې پرلهپسې چاودنې وشوې چې دوه یې د عبدالرحیم شهید ښوونځي مخې ته او درېیمه یې د «ممتاز» په نوم ښوونیز مرکز ته څېرمه شوې ده.
په ننګرهار کې د سلاموطندار د همکارې «حقیقت غږ» راډیو کارکوونکي وايي چې د اسلامي امارت ځواکونو د یادې راډیو مسوول الهام حقیقت نیولی دی.
د پاکستان بهرنیو چارو وزارت پرون په یوې خبرپاڼه کې وویل چې د افغانستان له خاورې وسلهوال ترهګر د دوی پر پوځیانو بریدونه کوي. دغو څرګندونو ته د چارو کارپوهان په دې اند دي چې پاکستان کې نیابتي جګړه او ناامنۍ ډېرې شوي او په داسې څرګندونو سره چې افغانستان کې ترهګرۍ دوی ته ګواښ پېښوي، غواړي نیابتي جګړه افغانستان ته ولېږدوي.
د پاکستان د بهرنیو چارو وزارت ویلي چې د واګه بندر له لارې افغانستان ته د هند له لوري د مرسته شویو غنمو د لېږد بهیر نېټه یې د دوو نورو میاشتو لپاره غځولې ده.
روزګان کې د امنيه قومنداني چارواکي وايي د دغه ولايت په مرکز ترينکوټ کې پرون ناوخته يو ماشوم ماين چاودني وژلی او يو بل ټپي دی.
په نورستان کې یوه شل کلن ځوان د خپلو ملګرو په مرسته خپل پلار د تبر په ګوزارونو وژلی دی. د نورستان ولایت ځایي چارواکي وایی چې دغه پېښه پرون د دې ولایت په اړوند وانټ وایګل ولسوالي کې رامنځ ته شوې ده.
د ماشومانو لپاره د ملګرو ملتونو د ملاتړې ادارې یا یونیسف د نړیوالو اړیکو مسوولې پالومه سکودرو ویلي چې څو لسیزو جګړو، وچکالۍ او د افغانستان مخ پر ودي اقتصاد پاشلتیا لامل شوی چې ماشومانو لپاره یو بېمخینې بشري ناورین رامنځته کړي. نوموړې ټينګار کړی چې یونیسف له تېرو ۷۰ کلونو راهیسې افغانستان کې د نجونو او ماشومانو لپاره کار کوي او له دې وروسته به هم له دغه هېواد څخه خپل ملاتړ ته دوام ورکړي.
د افغانستان د ځواکمنو ښځو غورځنګ له شپږم ټولګي پورته د نجونو د ښوونځیو پر تړل پاتېدو نیوکه وکړه. د دغه غورځنګ غړو نن کابل کې یوې خبري غونډې ته وویل، زدهکړه د ښځو اساسي حق ده او اسلامي امارت دې ژر تر ژره پر خپلې پرېکړې بیا کتنه وکړي.
د پاکستان د بهرنیو چارو وزارت ویاند عاصم افتخار پر افغانستان له هوايي برید وروسته ویلي، له څو میاشتو راپدېخوا اسلاماباد له کابل سره د ډيپلوماټیکو چینلونو له لارې ډیورنډ کرښې ته څېرمه سیمو کې د امنیت خوندیتوب او همغږۍ په موخه په اړیکه کې و.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
