په تېرو نږدې دوو کلونو کې د افغانستان د سیاسي کړکېچ د حل لپاره ګڼشمېر غونډې جوړې شوي، خو تر اوسه په عملي ډول اغېزناکې نهدي تمامې شوي.
د ناروې له غونډو پیل تر دوحې پورې چې ټولو کې پر ټولشموله حکومت، د بشري حقونو په پام کې نیول او له ترهګرۍ سره پر مبارزې ټینګار شوی، هېڅ غونډه نهده توانېدلې چې اسلامي امارت دغو غوښتنو ته په غاړه اېښودلو اړ کړي.
د افغانستان لپاره په بشري چارو کې د ملګروملتونو ځانګړي راپور ورکوونکي ریچارډ بنټ او یاد سازمان کې د نجونو او ښځو پر وړاندې د تبعیض کاري ډلې رییسې دو روټي استراداتانک افغانستان ته د بشري حقونو وضعیت په اړه د خپل وروستي سفر موندنې جېنوا کې د دې ټولنې دفتر ته وړاندې کړې دي.
د بغلان امنیتي مسوولان وايي چې د دغه ولایت په اړوند سیمه کې ناپېژنده وسلهوالو یو کس وژلی دی.
د بغلان د امنیې قومنداني د مطبوعاتو مسوول شېراحمد برهاني سلاموطندار ته ویلي چې بېګاه شپه د یاد ولایت د نهرین ولسوالي «حافظ بچه» سیمه کې ناپېژنده وسلهوالو د نورالدین په نوم کس وژلی دی.
د بهرنیو چارو وزارت د ویاند مرستیال ضیااحمد تکل پر ټویټر لیکلي چې د دغه وزارت د سرپرست امیرخان متقي په مشري یو سیاسي-سوداګريز پلاوی نن «د غويي پنځلسمه، د جمعې ورځ» پاکستان ته تللی دی.
د ملګروملتونو د خوړو او کرنې سازمان په یوه تازه راپور کې ویلي چې له ۲۰۲۲ کال راهیسې د افغانستان په ګډون د نړۍ اووه هېوادونه له بېوزلي او شدیدې لوږې سره مخ شوي دي.
د یاد راپور پر بنسټ، په سومالیا کې ۵۷سلنه خلک له لوږې سره مخ و چې له ورته وضعیت سره افغانستان، بورکینافاسو، هایټي، نایجریا، سوېلي سوډان او یمن هېوادونه هم مخ وو.
د ننګرهار امنیتي مسوولان وايي چې دغه ولایت کې یوه هلک د ټیکټاک ویډیو جوړولو لپاره خپل یو ملګری وژلی دی.
پېښه نن پنجشنبه د غويي ۱۴مه د ننګرهار ولایت د مومندرې ولسوالي اړوند سیمه کې رامنځته شوې ده.
د افغانستان بیارغونې لپاره د امریکا ځانګړې پلټونکې ادارې په یوه راپور کې ادعا کړې چې د ا.ا له واکمنېدو راهیسې تراوسه د امریکا حکومت افغانستان سره ۲.۱ میلیارډ ډالر مرسته کړې ده. له دې سربېره افغانستان کې د نړیوالو مرستو د لګښت څرنګوالي په اړه هم نیوکې شتون لري.
د ملګروملتونو سرمنشي انټونیو ګوټرېش د دوحې دوه ورځنۍ ناستې وروسته د یوې خبري غونډې پر مهال وویل چې یاده ناسته کې هڅه وشوه، څو ا.ا سره د تعامل په موخه ګټور او ګډ دریځ رامنځته شي.
د نوموړي په وینا، د یادې غونډې ګډونوالو ا.ا سره د تعامل او باثباته افغانستان سره د مرستې لپاره د یوې ګټورې تګلارې پر جوړېدو ټينګار کړی.
د ننګرهار امنیتي مسوولان وايي چې دغه ولایت کې امنیتي ځواکونو د انسان تښتونکو له منګولو یو ماشوم ازاد کړی دی.
د ننګرهار د امنیې قومنداني وياند عبدالبصير زابلي سلاموطندار ته ویلي چې د بټيکوټ ولسوالي اړوند سیمه کې امنیتي ځواکونو یو ماشوم د انسان تښوونکو له منګولو ازاد کړی دی.
د ایران د بهرنیو چارو وزارت ویاند ناصر کنعاني په یوه بیان کې ټینګار کړی چې له هلمند سیند څخه د «حقابې» اخیستل، د ایران لومړیتوب دی او دې برخه کې یې ا.ا سره خبرې هم روانې دي.
نوموړي د ا.ا له مسوولانو وغوښتل چې د ایران «حقابې» موضوع روښانه کړي او دغه هېواد ته خپله حقابه ورکړي. په دې وروستیو کې د ایراني چارواکو لهخوا دغه غوښتنه په جدي توګه مطرح شوې ده.
په روزګان کې یوه سرچینه د نوم نه ښودلو په شرط سلاموطندار ته وايي چې دغه ولایت کې یوه مېرمن د خپل خاوند د ورور «لېور» لهخوا د چړې په وسیله وژل شوې ده. د سرچینې په وینا، پېښه پرون دوشنبه د غويي ۱۱مه د دغه ولایت د دهراوود ولسوالي اړوند سیمه کې رامنځته شوې ده.
د سرچینې د معلوماتو پر بنسټ، یادې مېرمنې پنځه کاله وړاندې واده کړی و او قاتل د امنیتي ځواکونو لهخوا نیول شوی دی.
د امریکا او ا.ا ترمنځ د دوحې هوکړهلیک له لاسلیک څخه چې له مخې یې په افغانستان کې پخوانی اسلامي جمهوري نظام ونړېد او ا.ا واک ته ورسېده، څه دپاسه درې کاله تېر شول. ملګرو ملتونو په دې موده کې د ا.ا او نړیوالې ټولنې ترمنځ له ګڼو ناندریو او غبرګونونو وروسته، نن د قطر په پلازمېنې دوحه کې د افغانستان په اړه دوهورځنۍ غونډه جوړه کړه.
یوشمېر کابل ښاریان په دوحه کې د افغانستان په اړه د غونډې پیلېدو سره سم وايي، تمه لري چې په دې غونډه کې به د افغانستان روان کړکېچ ته د پای ټکی کېښودل شي او د دوی ژوند به ورسره مثبت بدلون ومومي. د دولسم ټولګي زدهکوونکې نجمه نبيزاده وايي، افغان نجونې او ښځې تمه لري چې د دوحې غونډه کې به یې د زدهکړو او کار لپاره اسانتیاوې برابرې شي.
ټاکل شوې ملګري ملتونه ا.ا سره د تعامل څرنګوالي په اړه خپله دوه ورځنۍ غونډه سبا دوشنبه د غويي ۱۱مه د قطر پلازمېنه دوحه کې پیل کړي.
دغه غونډه چې د ا.ا له استازیو پرته د ملګروملتونو د سرمنشي انټونیو ګوټرېش او د بېلابېلو هېوادونو د ځانګړو استازیو په حضور کې د تړلو دروازو ترشا جوړېږي، بېلابېل غبرګونونه راپورته کړي دي.
د ا.ا د بهرنیو چارو وزارت د ملګروملتونو امنیت شورا پرېکړهلیک ته په غبرګون کې ویلي چې د ښځو اړوند بحثونه د افغانستان کورنۍ مسله ده او پر نورو هېوادونو اغېز نهلري. د ملګروملتونو امنیت شورا تازه په یوه پرېکړهلیک کې له ا.ا غوښتنه کړې چې د ښځو پر کار او د نجونو پر زدهکړو بندیزونه لرې کړي.
د افغانستان بانک وايي چې سبا یکشنبه د غويي لسمه نېټه به «۱۴» میلیونه امریکايي ډالر د لیلام په توګه بازار ته وړاندې کړي.
د افغانستان بانک نن (شنبه د ۱۴۰۲ د غويي نهمه) پر خپله ټوېټرپاڼه لیکلي چې د «افغانۍ» ارزښت ساتنې او ثبات لپاره به سبا یکشنبه «۱۴» میلیونه امریکايي ډالر لیلام کړي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
