د بښنې نړیوال سازمان د امریکا د ولسمشر جوبایډن پرېکړه چې له مخې یې د افغانستان ۳.۵ میلیارډه کنګل شوې شتمني به د سپټمبر د ۱۱مې بریدونو د قربانیانو کورنیو ته ځانګړې کوي، ناعادلانه او تېروتنه بللې ده.
د باميان لسګونو اوسېدونکو نن له غرمې مخکې د دغه ولايت په مرکز کې لاريون وکړ او له امريکا متحدوایالاتو څخه يې د هېواد د شتمنیو د ازادېدو غوښتنه وکړه.
د افغانستان د کنګل شویو شتمنیو له جملې څخه د ۷ میلیارد ډالرو ازادولو او د سپتامبر د یوولسمې پېښې قربانیانو او افغانستان کې بشري مرستو ته د ځانګړې کولو په تړاو د امریکا د ولسمشر پرېکړې ته د غبرګونونو په دوام، نن کابل کې د افغانستان د ملت د یوالي کاروان یوه اعتراضیه غونډه کې د ولسمشر جوبایډن پرېکړه خاینانه او غیرانساني بولي او له نړیوالو په ځانګړې توګه ملګروملتونو څخه غواړي، چې هرڅه ژر بایډن له دغې پرېکړې راوګرځوي.
د اسلامي امارت د صفونو د تصفیې کمېسیون مسوولان وايي چې د یاد کمېسیون له جوړېدو راهیسې یې د اسلامي امارت له لیکو څخه د ۱۳۵ کمعمره ځوانانو په ګډون ۴۳۵۰ نامطلوبه کسان اېستلي دي. نوموړي زیاته کړه، هغه ځواکونه چې د دندو پرمهال د تلاشۍ ځایونو کې له ستونزې پرته پر موټرو ډزې کوي، د دوی د ظرفیت پر ټيټوالي او پر نه روزنې دلالت کوي.
د ژغورنې کمېټې اجرايي رییس او د بريټانیې د بهرنیو چارو پخوانی وزیر ډېوېډ میلیبند وايي چې لوېدیځ پر افغانستان د لوږې سیاست په تحمیلولو سره دغه هېواد او خپل ځای ځایګي ته له ناورین څخه ډک زیانونه اړولي دي. د هغه په وینا، باید دې ته اجازه نه وای ورکړل شوې چې په دې چټکۍ د افغانستان وضعیت خراب شي.
د ننګرهار د امنیې قومنداني مسوولان وايي چې د تېرې یوې میاشتې پر مهال یې په دې ولایت کې ۱۶۱ کسان د بېلابېلو جرمونو په تورنیولي دي.
یوشمېر خبریالان وايي، د اسلامي امارت ځواکونو یې وروسته له هغې د رسنیز پوښښ مخنیوی او ورته ګواښ کړی چې غوښتل یې کندهار ښار کې یوه اعتراض ته خبري پوښښ ورکړي. دغه خبریالان وروسته بیا د خلکو په غوښتنه بیرته راخوشې شوي دي. کندهار کې خبریالان وايي، د رسنیز پوښښ پر مهال له سختو ګواښونو سره مخ دي.
د جلالاباد ښار نهمه ناحیه کې د «عبدالخېلو» ۴۰ متره سړک چې ۱۲.۸ کیلومتره اوږدوالی لري، د جلالاباد ښار د کونړ لويېلارې سره نښلوي چې د جوړېدو ټکنۍ چارو یې خلک له ګڼو ستونزو سره مخ کړي دي.
امریکايي رسنیو رپوټ ورکړی چې د هغو ۱۳ امریکايي نظامیانو کورنۍ چې د کابل هوايي دګر برید کې وژل شوي، د دغه هېواد د دفاع وزارت/پنټاګون څېړنیزې موندنې تر پوښتنې لاندې راولي. د دغې پېښې د قربانیانو کورنۍ ټینګار کوي چې د دې پېښې د موندنو په اړه شکمن دي.
د کابل د مکروریانو د تدویر، ساتنې او څارنې دولتي شرکت چارواکو نن کابل کې د یوې غونډې پرمهال وویل چې د دولتي ادارو په ګډون د مکروریانو او پروژې اړوند سیمې له دغه شرکت څخه شاوخوا ۴۸۴ میلیونه افغانۍ پوروړي دي.
د هندي پوځ یوه جنرال ویلي، د امریکا د پوځ وسلې او د څارنې دستګاوې چې افغانستان کې یې ور څخه استفاده کوله، له هغو ترهګرو څخه نیولي چې غوښتل یې کشمیر ته ننوځي. نوموړي زیاته کړې، ترلاسه شوې وسلې د امریکايي پوځیانو دي چې په افغانستان کې یې ورڅخه ګټه اخیستله.
د افغانستان د شتمنۍ په اړه د امریکا د ولسمشر جو بایډن وروستي فرمان ته د غبرګونونو پر دوام نن کابل کې د پوهنتونونو د استادانو شورا یاده پرېکړه ناعادلانه وبلله او وویل چې امریکا دې له افغانانو څخه باج نه اخلي. دې شورا د بایډن وروستی فرمان له افغانانو سره ښکاره جفا بللې ده.
د افغانستان ملي ټلویزیون د پوهنې وزارت د مسوولانو له خولې ویلي چې کابل، لوګر او میدان وردګ ولایتونو کې ۴۰۰۰۰ ښوونکو باندې د نغدو مرستو د وېش لړۍ پیل شوې ده.
د ماشومانو لپاره د ملګرو ملتونو ملاتړې ادارې یا یونیسف ویلي چې محمد اګ ایویا یې په افغانستان کې د یاد بنسټ د نوي استازي په توګه ټاکلی دی.
ایراني رسنیو ویلي، په دغه هېواد کې یو موټر چې افغان کډوال یې په ناقانونه توګه ایران ته لېږدول، ټرافیکي پېښه کړې چې له امله یې مرګژوبله رامنځته شوې ده.
د ملګروملتونو سرمنشي انتونیو ګوترېش ویلي، له افغانستان څخه بهر د ترهګرۍ پراختیا د دې ښکارندوينه کوي چې ترهګر د واک له تشې څخه په ګټه اخیستنه کې مهارت لري. ګوترېش دغه څرګندونې پرون د مونیخ امنیتي ناستې په پرانیسته کې کړې دي. ګوترېش همداراز د نړیوالې ترهګرۍ له ګواښ څخه هم اندېښنه څرګنده کړې ده.
