د افغانستان د «خبریالانو ملي خونې» مسوولانو نن کابل کې یوې خبرې غونډې ته وویل چې په وروستیو شلو کلونو کې په ځانګړې توګه د وروستیو سیاسي بدلونونو وروسته، خبریالان او د افغانستان د رسنیو ټولنه زیانمنه شوې ده.
د کندهار ولایت یوشمېر اوسېدونکي وايي، په دې وروستیو کې دغه ولایت کې د وزګارتیا کچه لوړه شوې او ګڼشمېر کورنۍ د خوړو لپاره څه نهلري.
وروسته له هغې چې د پاکستان حکومت د نوي جوړ شوي قانون پربنسټ، د افغانانو تګ راتګ نور هم سخت کړ، په خیبر پښتونخوا کې ځینې افغان کډوال وايي، تازه جوړ شوی قانون له ګڼو ستونزو سره مخ کړي دي. یو افغان کډوال سلاموطندار ته وايي، کوم کسان چې ویزې یا اسناد نهلري اوس هم د پاکستاني پولیس لهخوا ځورول او نیول کېږي.
په هلمند ولایت کې یوشمېر مدني فعالان وايي چې واک د اسلامي امارت تر رسېدو وروسته یې فعالیتونه په ټپه درېدلي دي. دوی د خپلو فعالیتونو د درېدو ستر لامل، اقتصادي کمزورتیا، وزګارتیا او د اسلامي امارت له لوري یې فعالیتونو نامعلوم او ګونګ شرایط بولي.
د اسلامي امارت مشر هبتالله اخندزاده په خپل تازه پیغام کې د اسلامي امارت له غړیو غوښتنه کړې چې له قومپالنې او ژبپالنې ډډه وکړي.
په دغه څوارلس مادهییز لارښود کې د اسلامي امارت له غړو غوښتنه شوې چې له قومپالنې، سمتپالنې او ژبپالنې څخه په جدي توګه لاس واخلي.
خیبرپښتونخوا کې د «پښتنو قامي جرګې» افغانستان کې د ټاکنو او لویې جرګې له لارې د حکومت جوړولو غوښتنه وکړه. د افغانستان پخواني ولسمشر حامد کرزي د دغې قومي جرګې هرکلی کړی او هغه یې په سیمه او افغانستان کې د موجودو ستونزو د هوارولو لپاره نېک او اغېزمن گام بللی او د یادې جرگې له پرېکړهلیک څخه یې ملاتړ اعلان کړی دی.
د افغانستان د اسلامي وحدت ګوند مشر محمد محقق «افغانستان انټرنیشنل» شبکې سره تازه مرکه کې له خپلو پلویانو غوښتي چې خپلو سولهییزو مبارزو ته دوام ورکړي. هغه زیاته کړې، اوس مهال له اسلامي امارت سره د جګړې کوم پلان نه لري.
لوګر کې سرچینې وایي چې پرون شپه د مرکز پلعلم ښار اړوند د میرتاقي شاه په کلي کې د مخکیني حکومت د سیمهییزو پولیسو قوماندان او د روغې جوړې شورا د سلاکار فرهاد اکبري پر کور راکټي برید شوی دی.
د ترانسپورټ او هوایي چلند وزارت مسوولان وايي، پاکستاني لوري سره هوکړې ته رسېدلي چې د ترانسپورټي شرکتونو تر معرفي کېدو وروسته به، په لنډه موده کې د دواړو هېوادونو ترمنځ د مسافر وړونکو موټرو تګ راتګ پیل شي.
د پلازمېنې کابل یو شمېر اوسېدونکي د وسلهوالو غلاوو د زیاتوالي په اړه اندېښنه څرګندوي او وایي، که څه هم اسلامي امارت د هېوادوالو د امنیت تامین په اړه ډاډ ورکوي، خو وسلهوالو غلو د هغوی ژوند سخت کړی دی.
د بشري حقونو د څار ادارې د ښځو برخې مرستیالې هیدر بار، کابل ته د کډوالو په چارو کې د ملګروملتونو د عالي کمیشنر فیلیپو ګراندي له سفر سره هممهاله، له هغه غوښتي چې د اسلامي امارت له خوا د افغان ښځو پر بهرني سفر د بندیز لرې کولو په اړه دې خبرې وکړي.
د روغتیا نړیوال سازمان افغانستان کې د شري ناروغۍ د واکسین کمپاین پیلېدو څخه خبر ورکوي. دغه سازمان وايي، د شري ناروغۍ د واکسین تطبیق کمپاین د روانې مارچ میاشتې له ۱۲ څخه پیل شوی او تر ۱۷ پورې دوام کوي.
د روغتیا نړیوال سازمان یوه خبرپاڼه کې ویلي چې ټاکل شوې د شري ناروغۍ د واکسین دغه کمپاین کې څه باندې ۱.۲ میلیون ماشومان چې عمرونه یې له ۶ تر ۵۹ میاشتو وي، د هېواد ۲۴ ولایتونو کې واکسین کیږي.
د ترکیې بهرنیو چارو وزیر مولود چاووش اوغلو ویلي، اسلامي امارت تراوسه خپلې ژمنې نه دي عملي کړي. هغه ټینګار کړی چې اسلامي امارت دې د نړیوالې ټولنې له خوا په رسمیت پېژندو لپاره اړین ګامونه پورته کړي.
ټاکل شوې د ترکیې د «انتالیا ډيپلوماسۍ فورم» غونډه چې د تېرې جمعې پر ورځ پیل شوې وه، نن پای ته ورسېږي. یوشمېر سیاسي شنونکي په دغه غونډه کې د افغان پلاوي ګډون د هېواد په ګټه بولي. د چارو شنونکي وايي چې یاد کنفرانس کې د افغانستان په ګټه ښه لابي ګري وشوه او په یوشمېر مهمو برخو کې یې افغانستان ته لاستهراوړنې هم درلودې.
د ناټو سرمنشي ینس سټولټنبرګ له یوې المانۍ ورځپاڼې سره په یوې مرکه کې ویلي چې روسیه ښايي د اوکراین په جګړه کیمیاوي وسلې وکاروي. د رویټرز خبري اژانس په یوه رپوټ کې د ناټو د سرمنشي له قوله ویلي، که روسیه د اوکراین په جګړه کې کیمیاوي وسلې وکاروي، نو جنګي جنایت به یې کړی وي.
د بادغیس ولایت اوسېدونکي او مدني فعالان په دغه ولایت کې د قادس-قلعهنو د اوبو رسولو پروژې د ویجاړېدو په اړه د اندېښنو څرګندولو سره وايي چې یاده پروژه د موسمي بارانونو پرمهال سېلابونو زیانمنه کړې ده.
