د هلمند په مرکز لښکرګاه ښار کې ګڼشمېر هټۍوال وايي، له یوې خوا یې د تېر په پرتله سودا کمه شوې او بلهخوا پرې حکومت ټکس او مالیه لوړه کړې ده. د دوی په وینا، دغه وضعیت یې له ۵۰ تر ۷۰ سلنه ګټه وټه کمه کړې ده. یو هټۍوال محمدولي محمدي وايي چې د هلمند مستوفیت ترې ډېره مالیه ټولوي.
د ټرانسپورټ او ملکي هوايي چلند وزارت نن د یوې خبري ناستې پرمهال د خپل تېر یوه کال لاسته راوړنې له رسنیو سره شریکې کړې.
د غزني د روږدو کسانو د درملنې پنځوس بستر روغتون ډاکټران او کارکوونکي وايي چې له د روان کال له پیل راهیسې یې خپل معاشونه نه دي ترلاسه کړي او دې موده کې د دغه روغتون د لګښتونو لپاره هم هېڅ بودیجه په پام کې نه ده نیول شوې.
د نیویارک یوې محکمې امریکا کې د سپټمبر میاشتې د ۱۱مې پېښې قربانیانو ته د افغانستان د کنګل شویو پیسو د ورکړې غوښتنه رد کړې ده. د امریکا د فدرال محکمې یوې څارنوالې سارا نيټبرن د دې پرېکړې په اړه ویلي چې د افغانستان بانک په اړه امریکايي محکمې پرېکړه نه شي کولای.
جلالاباد کې یوه خیریه بنسټ ۱۵۰ هغه مېرمنې چې بېوزله او د کورنۍ سرپرست نهلري، د خیاطۍ په برخه کې روزلي او نن یې پر یادو مېرمنو د کار د پیل په موخه د خیاطۍ ماشینونه او نور وسایل ووېشل، څو د خپل کورني اقتصاد پياوړتیا او ستونزو حل په برخه کې ترې ګټه واخلي.
د ټرانسپورټ او هوايي چلند وزارت مسوولان وايي چې د «کېش اېرلاین» هوايي شرکت افغانستان ته خپلې الوتنې پیل کړې دي.
د یاد وزارت مرستیال غلام جیلاني وفا ویلي، دغه ایرانی شرکت چې نیمه دولتی دی. پرون یې له ایران څخه خپله لومړۍ الوتنه د افغانستان کندهار ولایت ته کړې ده.
د افغانستان د سوداګرۍ او پانګونې خونې مسوولانو نن «د ملي صادراتو ناستې په نوم جوړې شوې غونډه کې پر ګاونډیو هېوادونو غږ وکړ چې پر افغاني محصولاتو او توکو دې تعرفې کمې کړي. دا غونډه د هغو ۶۰ کورنیو سوداګریزو شرکتونو د ستاینې لپاره جوړه شوې وه چې تر نورو ډېر یې کورني تولیدات او محصولات بهر ته لېږلي دي.
د اټلانټیک کُنسول په نوم د امریکا د فکر خونې بنسټ افغانستان کې د نشهيي توکو د ننګونو په اړه یوه تازه راپورکې ویلي، د اسلامي امارت له واکمنېدو وروسته دغه هېواد کې د نشهيي توکو تجارت د ودې په حال کې دی.
راپور کې ویل شوي چې افغانستان کې د نشهيي توکو تجارت څه باندې نیم میلیونه کسانو ته د کار زمینه برابره کړې ده.
ملت ته د دولت د حساب ورکولو پروګرام په لړ کې نن د مخابراتو او معلوماتي ټکنالوژۍ وزارت مسوولانو د خپل کلني راپور د وړاندې کولو پرمهال وویل چې د اسلامي امارت په واکمنېدو سره دغه وزارت د بېلابېلو فعالیتونو له لارې ۶.۸۸۱ میلیارده افغانۍ عواید راټول کړي دي.
د جوزجان ولایت د مردیان ولسوالي په «جنګل اریغ» سیمه کې یوه نوښتګر ځوان محمدداوود یو موټر چې ۵۰ زره افغانۍ لګښت پرې راغلی، جوړ کړی دی. پر دغه موټر شوی لګښت د زرنج په پرتله درې برابره کم دی.
دغه ځوان د سلاموطندار خبریال ذکرالله یزداني سره په مرکه کې ویلي، که حکومت یې ملاتړ وکړي، تر دې ښه موټر به جوړ کړي. هغه هیله لري چې یوه ورځ په «جنګل اریغ» سیمه کې د موټرو جوړولو کارخونه جوړه کړي.
د افغانستان د ژورنالېستانو او رسنیزو بنسټونو فدراسیون یوه تازه راپور کې ویلي، د دغه بنسټ موندنې ښيي چې د اسلامي امارت واکمنېدو راهیسې شاوخوا ۸۰ سلنه ښځینه خبریالانو خپلې دندې له لاسه ورکړي دي.
راپور کې ویل شوي چې په دې وروستي یوه کال کې نږدې ۵۵ سلنه خبریالان هم وزګاره شوي او شاوخوا ۴۰سلنه رسنۍ تړل شوي دي.
د نیمروز یوشمېر اوسېدونکې او د بلوڅي جامو ګنډونکي وايي چې په دې وروستیو کې د دغه ولایت د اوسېدونکو لهخوا د بلوڅۍ جامو ګنډل او اغوستل ډېر شوي دي.
پکتیا کې صنعتکاران وايي چې د حکومت د لوړې مالیې او د بانکي محدودیتونو له امله له ګڼو ستونزو سره مخ دي چې په وینا يې، نهشي کولای د اړتیا وړ پیسې له بانکونو ترلاسه او خپل کاروبار پرې مخې ته بوځي.
د عامې روغتیا وزارت مسوولان وايي چې دغه وزارت د روان کال له پیله وړاندوینه کړې وه چې ښايي ۱.۱ میلیونه ماشومان هېواد کې پر شدیدې خوارځواکۍ اخته شي، خو یاد وزارت پر خوارځواکۍ د اخته ماشومانو شمېر له هغه کم بولي چې دوی یې وړاندوینه کړې وه.
رویټرز خبري اژانس د یوې سرچینې له قوله راپور ورکړی چې کابل کې د القاعده شبکې د مشر ایمن الظواهري له وژلکېدو سربېره به امریکا له اسلامي امارت سره د افغانستان بانک د کنګل شویو پیسو د ازادېدو په تړاو خپلو خبرو ته دوام ورکړي. والسټرېټ ژورنال لیکلي و چې امریکا په دې اړه له اسلامي امارت سره خبرې هم درولي دي.
د لوګر د کرنې، اوبو لګولو او مالدارۍ ریاست مرستیال محمد رفېع ابراهیمي سلاموطندار ته ویلي چې سږکال دغه ولایت کې د زردالو حاصلات د پام وړ زیات شوي دي.
