د هلمند د کرنې، اوبولګولو او مالدارۍ ریاست لهخوا په دغه ولایت کې د «خرما بڼونو» د دودولو لپاره هڅې پیل شوې دي.
د یاد ریاست د مسوولانو په وینا، سږکال یې د دغه ولایت یوشمېر سیمو کې بزګرانو ته پر ۱۰ جریبه ځمکه د خرما ننداریز او ازمایښتي بڼوڼه جوړ کړي، څو نور کروندګر هم د خرما بڼوڼو جوړولو ته وهڅول شي.
د پکتیکا محلي مسوولان وايي چې د دغه ولایت مرکز او ولسوالیو کې د اوو ښوونځیو جوړېدو لپاره خلکو ۳۷ جریبه ځمکه ځانګړې کړې ده.
دغه ځمکه په مرکز ښرنه، برمل او ګومل ولسواليو کې د یادو ښوونځیو لپاره ورکړل شوې. نوموړي ژمنه وکړه چې د روان کال تر پایه به هغو ښوونځیو ته هم ودانۍ جوړې کړي چې دا مهال ودانۍ نهلري.
د سرپرست حکومت له لوري د تېر ۱۴۰۲کال پرمهال افغانستان کې په ۱۷ بېلابېلو برخو کې ښځو ته سپارښتنې شوې چې د ۱۴۰۰ او ۱۴۰۱ کلونو پرمهال بیا د دې سپارښتنو شمېر ۴۹ ته رسېږي. د سرپرست حکومت په وار وار ویلي، دغه سپارښتنې د ټولنې سمون او په وینا یې، د اسلامي شریعت پلې کولو لپاره ورکول کېږي.
خوست کې د «شېرالله» په نوم د وژل شوي ډاکټر د کورنۍ غړي له حکومت غوښتنه کوي چې د نوموړي قاتلانو ته دې سخته سزا ورکړي.
ډاکټر شېرالله شاوخوا لس ورځې وړاندې د دغه ولايت مرکز اړوند د لکڼو په کوړيانو کلي کې د دوو کورنيو ترمنځ شخړه کې وژل شوی و.
پر افغان خاورې د پاکستان د هوايي بریدونو وروسته د دغه هېواد د دفاع وزیر خواجه اصف وايي چې له افغانستان سره وسلهواله نښته نهغواړي.
نوموړي له «امریکا غږ» سره په یوې مرکه کې ویلي: «زور وروستۍ خبره ده، خو موږ نهغواړو چې افغانستان سره په وسلهواله نښته کې ښکېل شو.» هغه ویلي: «که افغانستان موږ ته د دښمن په سترګه ګوري، نو موږ ولې دوی ته یو سوداګریز دهلیز ورکړو.»
پکتیا کې چارواکي وايي چې د دغه ولایت د زرمت ولسوالي اړوند سیمه کې د ۴.۹ میلیونه افغانيو په لګښت د اوبو یو کوچنی بند جوړ او ګټېاخیستنې ته وسپارل شو.
د چارواکو په وینا، دغه بند «۸۵» متره اوږدوالی، «۶.۵» متره لوړوالی او د «۱۵۰۰۰» مترمکعب اوبه زېرمه کولای شي.
د عامې روغتیا وزارت مسوولان وايي چې د ۱۴۰۱ کال په پرتله تېر ۱۴۰۲ کال پرمهال هېواد کې د کانګو تبې ناروغي پېښې زیاته شوې دي.
د یاد وزارت د ساري ناروغیو برخې رییس فخرالدین ستانکزي نن پنجشنبه، وري دویمه سلاموطندار ته وویل، د تېر کال پرمهال هېواد کې پر کانګو ناروغي اخته ۱۱۴ ناروغانو خپل ژوند له لاسه ورکړی دی.
د امریکا د استازو جرګې د بهرنیو اړیکو کمېټې د دغه هېواد د پوځ د لوی درستیزانو د کمېټې پخوانی مشر جنرال مارک میلي او د امریکا د مرکزي قومندانۍ پخوانی قومندان جنرال کنت مککنزي احضار کړل او له افغانستانه یې د امریکا د وتلو په اړه د توضیحاتو غوښتنه وکړه.
د ننګرهار یوشمېر سیمو کې تر ډېره هغه شاړې ځمکې چې له کلونو بېکښته پاتې وې، اوس ابادې شوي او د خړوبولو لپاره یې بزګران د لمریزې برښنا او واټرپمپونو په وسیله له ځمکې خوږې اوبه راباسي.
د همدې سیمو یوشمېر اوسېدونکي اندېښنه ښيي چې په دې کار سره د ځمکې لاندې د اوبو کچه ټيټيږي او د پاکو اوبو د لهمنځه تلو خطر یې زيات کړی.
د کندهار امنیتي مسوولان وايي، کندهار ښار کې د یوه ځانمرګي برید له امله درې کسان وژل شوي او ۱۲ نور ټپیان دي.
پېښه نن پنجشنبه، وري دویمه، سهار ۸:۳۰ بجې د کندهار ښار لومړۍ امنیتي حوزې اړوند «کابل بانک» مخې ته شوې. د کندهار د امنیې قومنداني ویاند ټينګار وکړ چې دغه ځانمرګي برید کې ډېری مرګژوبله ملکیانو ته اوښتې ده.
د افغانستان بانک مسوولان وايي چې «شنبه، وري څلورمه» به «۱۵» میلیونه امریکايي ډالر د لیلام په توګه بازار ته وړاندې کړي.
د افغانستان بانک نن (پنجشنبه، د وري دویمه) پر اېکس شبکه «ټوېټرپاڼه» لیکلي چې د «افغانۍ» ارزښت ساتنې او ثبات لپاره به رتلونکې شنبه «۱۵» میلیونه امریکايي ډالر لیلام کړي.
د پکتيا ډنډپټان ولسوالي اوسېدونکي وايي چې دغه ولسوالي کې ډیورنډ کرښې ته څېرمه له پاکستاني ځواکونو سره د جګړې پر مهال د یاد هېواد ځواکونو د ملکیانو کورونه په نښه کړي دي. د یادې ولسوالي اوسېدونکي زیاتوي، هر مهال چې د افغان او پاکستاني ځواکونو ترمنځ جګړه رامنځته کېږي، پاکستانی لوری د ملکیانو کورونه په نښه کوي.
د بلخ د مرکز مزارشریف ښار اوسېدونکي وايي چې د ۱۴۰۳ لمریز کال لومړۍ ورځ یې د تېرو دوو کلونو په څېر د جنډې له پورته کولو پرته پیل کړې ده.
دوی وايي، روژه او د نوروز پر نمانځنې د سرپرست حکومت بندیز د خلکو د ګڼهګوڼې کموالی لامل شوی او په وینا یې، سږ کال دا ورځ یې د عادي ورځو په څېر تېره کړې ده.
د افغانستان لپاره د سویډن کمېټې سرمنشي انډریاس سټفانسون تازه د دغه هېواد له یوې غږیزې رسنۍ سره په مرکه کې ویلي چې له درېوو ورځو راهیسې یې د ا.ا د سرپرست حکومت په غوښتنه په افغانستان کې فعالیت درولی دی. د افغانستان لپاره د سویډن کمېټې په اتلسو ولایتونو کې له اړمنو، په تېره ښځو، ماشومانو او معلولانو سره مرستې کولې.
په زابل کې د کرنې ریاست مسوولان وايي چې یاد ولایت کې د چرکانو ۵۰فارمونه شتون لري چې هر فارم په څه باندې یوه میاشت کې ۶۰۰۰ زره غوښن چرګان تولیدوي.
د یاد ولایت د کرنې، اوبولګولو او مالدارۍ ریاست رییس مولوي عطاءالله راشد سلاموطندار ته وايي چې تولید شوي چرګان د زابل ترڅنګ د هېواد نورو ولایتونو ته هم لېږدول کېږي.
پر خوست او پکتیکا د پاکستاني ځواکونو د هوايي بریدونو وروسته تېره ورځ دوشنبه، کب ۲۸مه د پاکستان او د افغانستان امنیتي ځواکونو ترمنځ یو ځل بیا سخته نښته شوې. د دغه برید په غبرګون کې اسلامي امارت د ډیورنډ فرضي کرښې په اوږدو کې د پاکستان پوځي مرکزونه په نښه کړل.
