د ولسمشرۍ مانۍ د عامه او سټراټېژیکو اړیکو ادارې رییس وحید عمر وايي، که څه هم ولسمشر غني په دوحه کې د سولې دویم پړاو خبرو د دوام په اړه هوکړه کړې ده، خو په وینا یې، د افغانستان په دننه کې د راتلونکو پړاوونو پر کېدو د دولت ټینګار پر خپل ځای دی.
د ملي پخلاینې شورا له جوړېدو څخه څه باندې ۷ میاشتې وروسته د دغې شورا پرانېستغونډه ۱۹ ورځې وړاندې په ارګ کې جوړه شوه او ټاکل شوې یاده شورا خپله لومړنۍ کاري غونډه د راتلونکې شنبې په ورځ جوړه کړي.
د ایران د بهرنیو چارو وزیر جواد ظریف تېره ورځ له طلوعنیوز ټلویزون سره په یوه مرکه کې ویلي، د امریکا او طالبانو ترمنځ د سولې هوکړه د امريکا د ولسمشر ډونالډ ټرمپ د ټاکنیز کمپاین په موخه لاسلیک شوې او راتلونکي کې به افغانستان لپاره خطرناکې پایلې ولري او له همدې کبله یې دوحه کې د سولې جوړې شوې غونډه کې ګډون هم نه و کړی.
ولسمشر محمداشرف غني وايي، د هېواد په دننه کې د دولت او طالبانو ترمنځ د سولې خبرو اترو د دویم پړاو پر مخ بیولو ته لومړیتوب ورکوي.
د بشري حقونو او د تاوتریخوالي د مخنیوي موسسې او د مدني ټولنې او بشر حقونو شبکې نن په کابل کې د «د افغانستان زیانمن لږکي او د سولې بهیر» په اړه د یوې نظرپوښتنې پایلې خپرې کړې.
ځینو سرچینو سلاموطندار ته ویلي، د افغان دولت او وسلهوالو طالبانو د سولې مرکچیانو هوکړه کړې چې له څو ورځني ځنډ وروسته به د سولې خبرې اترې بیا پیلوي.
د ولسمشر د ملي امنیت سلاکار حمدالله محب طالبانو ته وړاندیز کړی چې د سولې خبرو اترو پاتې پړاوونه په افغانستان کې پر مخ یوسي.
قطر کې د حکومت د مرکچي پلاوي یوه غړي چې نه یې غوښتل نوم یې خپور شي سلاموطندار ته وویل، د مذاکراتو د کړنلارې په اړه پخوا هوکړه شوې وه او د مقدمې په اړه ځینې ستونزې وې چې وضاحت ته اړتیا وه.
سرچینه وایي، وړمه ورځ انګلستان، امریکا، ملګروملتونو او اروپایي ټولنې د ځینو غړیو هېوادونو لکه جرمني او ناروې د استازو په منځګړیتوب سره حکومتي پلاوي ته وضاحت ورکړل شو چې د دواړو لورو د قناعت وړ و او پر مقدمې هم هوکړه وشوه.
سرچینې رسنیو ته تاییدوي چې د قطر په ګډون ازبکستان، جرمني، ناروې او اندونیزیا به بینالافغاني مذاکراتو کې د بنبست لرې کولو لپاره د منځګړي په توګه عمل وکړي؛ خو قطر کې د طالبانو د سیاسي دفتر ویاند محمد نعیم سلاموطندار سره خبرو کې د سولې خبرو کې د منځګړيتوب مسله رد کړه.
د ملي مصالحې عالي شورا وياند فريدون خوځون پر خپله فېسبوک پاڼه ليکلي چې د دولت د سولې د مذاکراتي پلاوي ۴ غړي د اداري او شخصي کارونو د ترسره کولو په موخه کابل ته راغلي او بېرته دوحې ته ځي.
په قطر کې د افغان دولت او طالبانو د استازيو ترمنځ د سولې له مذاکراتو یوه باخبره سرچینه سلاموطندار سره خبرو کې وايي، ټاکل شوې نن شپه له درېیمې عمومي غونډې وروسته د سولې د تماس ډلې له یو بل سره ناسته ولري.
افغان سولې لپاره د امريکا د بهرنيو چارو وزارت ځانګړي استازي زلمي خليلزاد ويلي، له طالبانو سره د ده او افغانستان کې د ناټو ځواکونو د غوڅ ملاتړ ماموريت قومندان سکاټ مېلر په څو ناستو کې منلې چې د امريکا او طالبانو ترمنځ د شوې هوکړې په موادو د عمل او پر ټولو ژمنو د درېدو اقدامات بايد له سره تنظیم شي.
قطر کې د افغان دولت مرکهچي پلاوي او طالبانو تېره ورځ ماښام خپلو کې سره عمومي غونډه کړې. د دولت د مرکهچي پلاوي غړي نادر نادري ویلي، غونډه کې چې د دواړو پلاويو رییسانو معصوم ستانکزي او عبدالحکیم هم په کې ګډون درلود، پر اختلافي موضوعاتو بحث شوی.
ولسمشر محمداشرف غني نن سهار د یوه لوړپوړي پلاوي په مشري په دوه ورځني سفر کویټ او قطر ته ولاړ.
په قطر کې د طالبانو سیاسي دفتر ویلي چې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد د دغه دفتر له رییس ملا برادر سره لیدلي دي. خلیلزاد دوه ورځې وړاندې دوحې ته تللی و.
د سولې لپاره د مدني ټولنې د غونډو په دوام، د افغان ښځو د سولې ازادي سازمان او د افغانستان د علماوو نهضت نن په کابل کې د یوې غونډې پر مهال د دولت او طالبانو ترمنځ د خبرواترو پایلې ته د رسېدو غوښتنه وکړه.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
