په قطر کې د افغان دولت او طالبانو د استازيو ترمنځ د سولې له مذاکراتو یوه باخبره سرچینه سلاموطندار سره خبرو کې وايي، ټاکل شوې نن شپه له درېیمې عمومي غونډې وروسته د سولې د تماس ډلې له یو بل سره ناسته ولري.
سرچینه زیاتوي، افغان پلاوی له هر پلوه چمتو دی خو تر اوسه د طالبانو له خوا روښانه ځواب نه دی ترلاسه شوی او څرګنده نه ده چې د طالبانو د تماس ډله به په ناسته کې ګډون وکړي که نه.
په دوحه کې د افغان دولت د مرکچي پلاوي غړی خالد نور هم وايي چې بحثونه دوام لري خو لا هم د کوم پرمختګ څرک نه لګېږي
نور زیاتوي، هیله مندي شته چې ښايي دواړه ډلې ډېر ژر یوې پایلې ته ورسېږي.
تردې وړاندې د سولې د خبرې کوونکي پلاويو عمومي درېیمه غونډه کې چې د اکتوبر په ۱۴مه نېټه تر سره شوه، د دواړو پلاويو ټولو غړيو د اختلافي مواردو په حل او د حل لارو په وړاندیز کولو تینګار وکړ.
خو سره له دې چې له دې غونډې درې ورځې تېرېږي تر اوسه د دواړو لورو تماس ډلې نه دي توانېدلي، غونډه وکړي.
خو دلته په افغانستان کې د دوحې د خبرو له پیله له ولایتونو نیولې تر پلازمېنې، خلک د سولې نارې وهي او د سمبولیکو حرکتونو په ترسره کولو څرګندوي چې له جګړې ستومانه شوي دي.
تراوسه په هلمند، ننګرهار، هرات، کندوز، پکتیا او نن په کابل کې خلکو د جګړې تابوت په دې شعار چې سوله غواړو، خاورته وسپاره.
