د ولسي جرګې یو شمېر غړيو نننۍ عمومي غونډه کې وویل، سره له دې چې د مالیې وزارت د ۱۴۰۰مالي کال د بودیجې درېیمه مسوده هم جرګې ته استولې؛ خو بیا هم ډېرې ستونزې لري.
دوی وايي، سره له دې چې د ولسي جرګې غړيو د نامتوازنوالي له کبله د ۱۴۰۰مالي کال د بودیجې مسوده دوه ځلې رد کړې؛ خو د بودیجې درېیمه مسوده هم د ستونزو له حل پرته جرګې ته استول شوې ده.
امريکايي جمهوري غوښتونکي سناتور لیندسي گراهام ويلي، د امريکا او طالبانو ترمنځ د شوې هوکړې له مخې به امريکايي سرتېري په ټاکل شوې موده « د روان ميلادي کال مې مياشت» کې له افغانستانه ونه وځي.
د بهرنیو چارو وزارت له القاعده شبکې او نورو ترهګرو ډلو سره د طالبانو د اړیکو دوام په اړه د ملګرو ملتونو د وروستي راپور هرکلی کړی او له دغه سازمان او خپلو نورو نړیوالو متحدانو یې غوښتي چې دا ډله اوربند ته اړ باسي.
دغه وزارت په یوه خبرپاڼه کې له ملګرو ملتونو او د افغانستان له نورو نړیوالو شریکانو غوښتي چې پر طالب ډلې فشار راوړي، څو له هدفي وژنو او ترهګرو ډلو سره له اړیکو لاس واخلي.
د لویې څارنوالۍ ویاند جمشېد رسولي وايي، د اداري فساد له لویو جرمونو سره د مبارزې عدلي او قضايي مرکز ابتدایه محکمې د بلخ پخوانی ښاروال محمد نصیر عیني له وظیفوي واک څخه د ناوړه ګټې اخيستنې په تور په یوه کال او شپږ میاشتو تنفیذي بند محکوم کړی دی.
د کندوز د ولایتي شورا غړي او اوسېدونکي امنیتي ځواکونو ته د سپکاوي لپاره د دغه ولایت د والي عبدالستار میرزکوال د ګوښه کولو غوښتنه وکړه. دوی د کندوز محلي حکومتي چارواکي د خلکو د امنیت په ساتلو کې په پاتې راتلو تورن کړل.
د کندوز د ولایتي شورا غړي او سلګونو اوسېدونکيو نن په يوه اعتراضيه غونډه کې د دې ولایت امنیتي وضعیت د اندېښنې وړ وباله او ویې ویل، تر هغه چې د کندوز محلي چارواکي له دندو لرې شوي نه وي، خپلو اعتراضونو ته به دوام ورکوي.
افغانستان له هنده د کورونا واکسین لومړۍ جوپه ترلاسه کړه. د کورونا واکسین دغه بسته ۵۰۰ زره ډوزه ده؛ خو تراوسه يې د نړيوال روغتيايي سازمان تاييدي نه ده ترلاسه کړې.
د عامې روغتیا وزارت سرپرست وحيدالله مجروح د ياد واکسين د ترلاسه کولو پر مهال د حامد کرزي نړيوال هوايي ډګر کې رسنیو ته وويل، ټاکل شوې چې په دې شمېر واکسین سره ۲۵۰ زره افغانان واکسین شي.
له دوو ورځو را په دې خوا د کابل د شهزاده سرای چې د بهرنیو اسعارو د تبادلې او را کړې ورکړې لوی بازار دی د صرافانو د کاري پرلت پر بنسټ تړل شوی دی. صرافان وایی دوی نه غواړي چې شرکتونه جوړکړي او جواز یې شرکتي وي؛ خو د افغانستان بانک بیا وایي چې دا کار د دوی په ګټه دی او په دې سره د تورو پیسو د مینځلو مخنیوی کېږي؛ نو باید ټول صرافان تجارتي جوازونه ترلاسه کړي چې صرافان یې نه مني.
د ښځو یوشمېر بنسټونو د «سولې او امنیت لپاره د ښځو نوښت» په نوم یو اېتلاف پرانېسته. دغه اېتلاف له ۱۵ بنسټونو چې په کابل او ولایتونو کې فعالیت کوي، جوړ شوی دی.
د کلید ګروپ رییسه نجیبه ایوبي وايي، د دغه اېتلاف د جوړېدو موخه د سولې پروسه کې د ښځو د ګډون په اړه ډاډ ترلاسه کول او د مدني ټولنو په ډله کې د هغو بنسټونو ګډ کار دی چې د ښځو له لوري یې مشري کوي.
د بلخ سلګونو اوسېدونکو نن په یوه لاریون کې له دولت نه وغوښتل چې عبدالرووف پیدا او د انسان تښتوونکو له منګولو یې وژغوري. دغو معترضانو د حکومت محلي او مرکزي ادارې ته ۷۲ ساعته وخت ورکړ، څو یاد ماشوم را خوشې کړي.
معترضان خبرداری ورکوي، که حکومت په درې ورځو کې عبدالرووف را خوشې نه کړ، یو ځل بیا په دغه ولایت کې دولتي ادارې او بندرونه وتړي.
د هرات اوسېدونکي او د قصابانو اتحادیې مسوولان وايي، د څارویو قاچاق لامل شوی چې د یوې کیلو غوښې بیه له ۷۰ تر ۸۰ افغانیو پورې لوړه شي. د یادې اتحادیې مسوولان خبرداری ورکوي، که د دغه قاچاق مخه و نه نیول شي، د غوښې بیه به نوره هم لوړه شي.
د ننګرهار چارواکي وايي، نن سهار شاوخوا پنځه بجې د ننګرهار ولایت د خوږیاڼو ولسوالي اړوند په چمتلې سیمه کې د پولیسو پر یوې پوستې موټربم برید شوی چې تر اوسه ترې د یوه سرتېري د وژل کېدو او دوو نورو د ټپي کېدو خبر ورکړل شوی دی.
د ننګرهار ولایت د رسنیو دفتر د دغه خبر پخلی کړی او لیکلي یې دي چې ياد موټربم د یوه سراچه موټر په وسیله چې چاودېدونکي توکي پهکې و، شوی دی.
د افغانستان بانک د تازه پرېکړې پر بنسټ له دې وروسته د هېواد ټول صرافان د انفرادي جواز پرځای باید شرکتي جواز واخلي، د مرکزي بانک دغه پرېګړه په هېواد کې د صرافانو له تند غبرګون سره مخ شوې ده.
د افغانستان د پيسو خدمتونو او صرافانو عمومي ټولنه، افغانستان بانک د صرافانو په کارونو کې د تخنیکي ستونزو پر رامنځته کولو تورنوي.
د پروان ولایت د بګرام ولسوالي سلګونو اوسېدونکو د دې ولسوالي د امنیه قوماندان د لرې کولو په غبرګون کې اعتراض وکړ. د دوی په وینا، ولسمشر غني د دې لپاره چې د ولسي جرګې له رییس میررحمان رحماني نه غچ واخلي، د بګرام ولسوالي د ناامنه کولو په لټه کې دی.
د ولسمشر د ملي امنیت سلاکار حمدالله محب نن له نورو لوړپوړو چارواکو سره په ګډه خبري غونډه کې وویل، طالبان د نظام ړنګولو هڅه کوي او غواړي واک ترلاسه کړي.
د محب په خبره، طالبان که د ټول هېواد په ورانولو هم کېږي، واک ته د رسېدو لپاره دا کار کوي او په وینا یې، له ځان پرته ورته بل هېڅوک نه افغان او نه هم مسلمان ښکاري.
د غور د ولایتي روغتون ډاکټرانو د روغتونونو د اصلاحاتو پروژې حذف په تړاو اعتراض کړی او دغه پرېکړه يې، سلیقهيي، د ملي ګټو او د درملنې خدمتونو د وړاندې کولو پر ضد بولي.
دوی وايي، دغه پروژه د خلکو لپاره د درملنې خدمتونو وړاندې کولو په برخه کې د روغتونونو له شفافیت او ابتکار څخه د الګو بڼه لري.
د سیمې یو شمېر هېوادونو ته د سفرونو په دوام د طالبانو یو پلاوی دا ځل ترکمنستان ته تللی دی. قطر کې د طالبانو د سیاسي دفتر ویاند محمد نعیم تېره ورځ پر ټوېټرپاڼه لیکلي، دغه پلاوي یې د ترکمنستان په رسمي بلنه دغه هېواد ته سفر کړی او موخه یې هم پر ګډو مسایلو، سوداګریزو اړیکو، سیاسي پرمختګونو او نورو موضوعاتو خبرې کول دي.
