ولسمشر محمداشرف غني نن له غرمې مخکې د ملي روغې جوړې شورا له رییس عبدالله سره په ارګ کې لیدلي دي.
ولسمشرۍ ماڼۍ وايي، په یاده غونډه کې ولسمشر ته د ملي روغې جوړې شورا د رییس له لوري د دې شورا د دویمې ناستې د راپور ورکولو ترڅنګ، د سولې دویم پړاو خبرو پر ځای او نېټه هم خبرې شوې دي.
د ولسمشر لومړی مرستیال امرالله صالح وايي چې طالبان له نوي افغانستان سره د ګډ او سولهييز ژوند باور نه لري او د دوحې هوکړه د ډلې د کاذب باور لامل شوې ده. هغه وايي، دا باور یې له هغه وروسته پیدا کړ چې د ملي روغې جوړې شورا په دویمه غونډه کې یې د دولت د سولې مرکچي پلاوي خبرې او تبصرې واورېدې.
کاپیسا کې یوه امنیتي سرچینه چې نه غواړي نوم یې یاد شي وايي، د دغه ولایت د ملي امنیت او پولیسو ګډو ځواکونو په نظامي عملیاتو کې د فرشتې کوهستانۍ او د هغې د ورور وژلو په تور څلور کسان نیولي دي.
د افغانستان د اسلامي جمعیت ګوند مرستیال احمد ضیا مسعود پر افغانستان د پخواني شوروي د یرغل د ۴۱مې کالیزې په اړه جوړه شوې غونډه کې وويل، که ولسمشر محمد اشرف غني نهشي کولی هېواد اداره کړي، سیاسي واک دې دفاع وزارت او پوځ ته وسپاري، ترڅو د ترهګرۍ پر وړاندې رښتينې مبارزه وشي.
د غور ـ هرات لویېلارې یو شمېر مسافران او د دغه ولایت د ولسوالیو اوسېدونکي سلاموطندار ته وايي، د درنې واورې ورېدو او توپانونو له کبله د غور ـ هرات او غور ـ کابل لویېلارې په ګډون د دغه ولایت مرکز سره د ټولو ولسوالیو مواصلاتي لارې تړل شوي دي.
د دوی په وینا، که دولت د دغو لارو پرانیستو ته پام ونهکړي، ډېرو ستونزو سره به مخ شي او نهشي کولی خپلو سیمو ته لاړ شي او یا هم ناروغان روغتیايي مرکزونو ته ولېږدوي.
د ملي روغې جوړې عالي شورا د رهبري کمېټې دویمه ناسته چې په سپیدار ماڼۍ کې جوړه شوه، د افغان دولت د سولې مرکچي پلاوي غړیو، د ولسمشر لومړي مرستیال امرالله صالح، دویم مرستیال سرور دانش، پخواني ولسمشر حامد کرزي او یوشمېر نورو جهادي څېرو پهکې ګډون کړی و.
ولسمشر محمد اشرف غني د هېواد امنیتي او دفاعي ارګانونو ته لارښوونه کړې چې د ملکي وګړيو او په ځانګړي ډول د هېواد د سیاسي، مدني او ټولنیزو فعالانو چې په دې وروستیو کې د ترهګريزو بریدونو هدف ګرځېدلي دي، پيدا او سزا ورکړل شي.
له ارګه په خپره شوې خبرپاڼه کې راغلي چې ولسمشر امنيتي او دفاعي ارګانونو ته د لا ښه…
د عامې روغتیا وزارت وايي چې په تېرو ۲۴ ساعتونو کې ۱۰ کسان چې پر کورونا اخته وو، مړه شوي دي.
دغه وزارت نن په خپل ورځني راپور کې ویلي چې په یوه شپه او ورځ کې یې د ۹۷۸ شکمنو کسانو نمونې کتلي چې له ډلې یې د ۸۳ هغو پایلې مثبتې ختلې دي.
امنیتي چارواکي وايي، کابل ښار کې نن سهار د چسپکي ماينونو ۳ چاودنې شوي. د کابل د امنیې قومندانۍ ویاند فردوس فرامرز وايي، دغه چاودنې د کابل ښار په اتمه، شپږمه او درېیمه امنیتي حوزو کې شوي چې له کبله يې ۲ پولیسان وژل شوي او د دوه ښځينه پوليسو په ګډون ۳ کسان نور ټپيان دي.
د عامې روغتیا وزارت وايي چې په تېرو ۲۴ ساعتونو کې ۱۳ کسان چې پر کورونا اخته وو، مړه شوي دي.
دغه وزارت نن په خپل ورځني راپور کې ویلي چې په یوه شپه او ورځ کې د ۲ زره او ۲۷۵ شکمنو کسانو نمونې کتل شوي چې له ډلې یې د ۱۷۰ هغو پایلې مثبتې ختلې دي.
یوشمېر مسافر له بېګاه راهیسې د هرات-غور پر لویې لارې په «بند بایان» سیمه کې د واورې اورېدو او توپان له کبله بند پاتې دي. دغه مسافر چې شمېر یې له ۱۵۰ نه اوړي، وايي چې ښځې او ماشومان هم ورسره دي.
بېوزلي، وزګارتیا او لوږې چې د جګړې د دوام له کبله یې په غور کې پر خلکو سیوری غوړولی، په دغه ولایت کې پر خوارځواکي د ماشومانو د اخته کېدو لامل شوي دي. یوشمېر کورنۍ چې ماشومان یې پر خوارځواکي اخته دي وايي، ډېرې شپې په وږې خېټه ویده کېږي.
د افغان سولې لپاره د امریکا د بهرنیو چارو وزارت ځانګړی استازی وايي، هدفي وژنې او ترورونه د سولې پروسه ګواښي او باید ودرول شي. نوموړي تازه پر خپلې ټویټرپاڼې لیکلي چې افغانان سوله غواړي. د نوموړي په وینا، اوربند او سیاسي هوکړه بیړنۍ هوکړې ته اړتیا لري.
د افغانستان د مدني ټولنې مجتمع او په افغانستان کې د بشري حقونو د مدافعانو کمېټې مسوولان وايي، د تېر یوه کال راهیسې په افغانستان کې د بشري حقونو او مدني ټولنې ۲۳ فعالان وژل شوي دي. د نوموړي په وینا، په یاده موده کې د بشري حقونو او مدني ټولنې فعالانو ته د ۵۴ سختو ګواښونو شاهدان وو چې له ډلې یې د ۱۷ هغو قضیو د څېړلو په برخه کې یې لازمه مرسته ورسره کړې ده.
د اطلاعاتو او کلتور وزیر طاهر زهیر وايي، پر خبریالانو برید جنګي جنایت دی او امنیتي ادارې باید د خبریالانو د ژوند خوندیتوب لپاره لاس په کار شي.
نوموړي نن د یوې خبري غونډې پر مهال د ملي امنیت له عمومي ریاست او کورنیو چارو وزارت نه وغوښتل چې د خبریالانو د ژوند ژغورلو لپاره پر ځانګړو طرحو کار وکړي.
د ملي پخلاینې شورا له جوړېدو څخه څه باندې ۷ میاشتې وروسته د دغې شورا پرانېستغونډه ۱۹ ورځې وړاندې په ارګ کې جوړه شوه او ټاکل شوې یاده شورا خپله لومړنۍ کاري غونډه د راتلونکې شنبې په ورځ جوړه کړي.
