عامې روغتیا وزارت د تازه شمېرو په خپرولو سره وايي، په تېره یوه شپه او ورځ کې پر کورونا ۳ اخته کسان په کابل، ۵ په هرات، ۲ په تخار او یوه – یوه هم په ننګرهار او زابل ولایتونو کې مړه کړي چې په دې سره په ټول هېواد کې د کورونا له کبله د مړو شویو کسانو شمېر ۱۶۷۵ ته ورسېد.
د امریکا سفارت او اروپايي اتحادیې پر کابل ښار راکېټي بریدونه چې له کبله یې اته کسان ووژل شول او ۳۱ نور ټپیان شول، وغندل.
د لوړو زدهکړو وزارت اعلان کړی چې د کابینې د پرېکړې له مخې د کورونا ویروس د خپرېدو مخنیوي لپاره ټول پوهنتونونه د روانې لېندۍ میاشتې له اتمې نېټې د کب تر پنځلسمې پورې رخصتېږي.
په افغانستان کې د امریکا سفارت له هغه وروسته چې نن سهار پر کابل ښار راکېټي بریدونه وشول، خپلو وګړو ته خبرداری ورکړی او په افغانستان کې روان وضعیت یې «بېثباته» بللی دی.
کورنیو چارو وزارت ویلي چې نن سهار پر کابل ښار ۲۳ راکېټونه لګېدلي چې له کبله یې ۸ کسان وژل شوي او ۳۱ نور ټپیان دي.
په بغلان کې امنیتي مسوولان وايي چې د دغه ولایت په مرکز پلخمري ښار کې پر یوې پوستې د طالبانو برید کې یو قوماندان او دوه سرتېري وژل شوي دي.
د سولې لپاره د امریکا د بهرنیو چارو وزارت ځانګړی استازي او د ازبکستان د بهرنیو چارو وزیر عبدالعزیز کاملوف پر افغان سولې خبرې اترې کړې دي.
د پاکستان لومړی وزير عمران خان نن «پنجشنبه د لړم ۲۹مه» کابل ته راغی. نوموړي نن له افغان ولسمشر محمد اشرف غني سره په ګډه ناسته کې وويل، کابل ته راغلی تر څو ډاډ ورکړي چې دولت يې افغانستان سره د سولې او اوربند برخه کې مرسته کوي.
د پاکستان لومړي وزير په خپلو خبرو کې وويل، د دواړو لوريو نيمايي نفوس له ترهګرۍ سره په جګړو کې زيانمن شوی.
دوحه کې سرچينو رسنيو ته ويلي، د افغان دولت او طالبانو د مذاکراتي پلاويو ترمنځ پر اختلافي مواردو هوکړه شوې ده.
دا په داسې حال کې ده چې نن مخکې له غرمې د پاکستان لومړی وزير عمران خان هم کابل ته راغی او مذاکره کوونکي پلاوي پر کړنلارې هوکړې ته د رسېدو خبر ورکړ.
له دې وړاندې د دواړو لوريو ترمنځ خبرې اترې بن بست سره مخ شوې وې.
د باميانو د پوهنې رياست مسوولان وايي، ياد ولايت کې ۱۰ سلنه زدهکوونکې نجونې د ژر واده کولو له کبله ښوونځي خوشې کوي.
د ياد ولايت د پوهنې رييس ایوب امیري سلاموطندار سره خبرو کې وويل، د دوی د رياست موندنې ښيي چې له ۱۳۹۷ کال را وروسته شاوخوا ۱۲۰۰۰ نجونې ښوونځيو ته نه دي حاضرې شوي.
بدخشان کې محلي مسوولان وايي چې د ياد ولايت مايمي ولسوالۍ د طالبانو لاس ته پرېوته. د مايمي ولسوال کامبېز قرباني ياد خبر تاييد کړی دی.
د بدخشان له مايمي ولسوالۍ يوه سرچينه سلاموطندار ته وايي، طالبانو د مايمي ولسوالۍ امنيې قومندان، د ملي امنيت مدير، جنايي مدير او يو شمېر امنيتي ځواکونه وژلي دي.
د پاکستان لومړی وزير عمران خان نن مخکې له غرمې کابل ته راورسېد او ټاکل شوې له ولسمشر غني او يو شمېر نورو افغان چاوراکيو سره ليده کاته وکړي.
د عمران خان به په دې سفر کې له ولسمشر غني سره د افغان سولې پروسې، سوداګرۍ، اقتصادي پراختیا او دوه اړخیزه اړیکو او سیمه ییزو مسایلو په اړه خبرې وکړي.
د عامې روغتیا نوماند وزیر احمد جواد عثماني نن په کابل کې د خبري ناستې پرمهال د کرونا ویروس اړوند تازه معلومات خپاره کړل او ويې ویل، هېواد کې د کرونا ویروس دویمه څپه خپره شوې او له کبله یې روغتونونو ته د مراجعه کوونکيو کسانو شمېر کې ۱۰ سلنه زیاتوالی راغلی دی.
د نوموړي په وينا، په دولتي او خصوصي روغتونو کې د کرونا د مثبتو پېښو شمېر هم ۵ سلنه لوړ شوی دی.
په یو شمېر ښوونځیو کې بېنظمیو د کورنیو اندېښنې را پارولي او وايي، د پوهنې په سیسټم کې د بېنظمیو موجوديت د منلو نه دی او د هېواد پوهنیز نظام د فلج په درشل کې دی. د دغو کورنیو په خبره، ګڼ شمېر ښوونځیو کې ښوونکي نشته او زدهکوونکي له لوست پرته بېرته خپلو کورونو ته ستنېږي.
د ننګرهار د کانال ریاست مطبوعاتي مسوول سید همایون غریبمل سلاموطندار ته وویل، د اټکل له مخې سږ کال د زیتونو فارمونه تر ۵سوه ټنه حاصل ورکوي چې له لسو ټنو به یې اچار او د ۴۹۰ ټنو تر پروسس وروسته به یې تېل تولید کړي.
غريبمل وايي، د زیتونو د اچارو او تېلو تولید هم د ننګرهار زیتونو فابریکه کې کېږي. د ننګرهار د کانال ریاست اړوند پر ۳۱۰۰ هکټاره ځمکه د زیتونو باغونه جوړ وو چې د دغو باغونو ډېرې ونې د کورنیو جګړو پر مهال له منځه وړل شوي او اوس یې یوازې ۱۷۲۰ هکټاره باغونه زیتون ورکوي.
د لوګر ارزې، خوښۍ او خروار ولسوالیو کې د نجونو پر مخ له څلورم ټولګي د پورته ښوونځیو له تړل کېدو وروسته، اوس مرکز پلعلم او برهکي برک، څرخ او محمداغې ولسوالیو کې له منځنۍ دورې پورته ښوونځي د نجونو پرمخ تړل شوي دي.
د لوګر د پوهنې ریاست ویاند شاهپور عرب سلاموطندار ته وویل، د ناامنیو زیاتېدو له کبله برهکيبرک، محمداغې او څرخ ولسوالیو کې له څلورم ټولګي او مرکز پلعلم کې له شپږم ټولګي پورته ښوونځيو کې د نجونو لیک لوست بند شوی.
