سلاموطندار د تېرې اوونۍ د پنجشنبې پر ورځ په فاریاب کې د یوې کورنۍ په اړه راپور خپور کړ چې د بېوزله له کبله یې خپل لس کلنه لور د میمنې ښار بازار ته د پلور لپاره راوستې وه چې وروسته د نجلۍ پلار هغه پر یوه کس وپلورله. له یوې خیرغوښتونکې مېرمنې سره د سلاموطندار په همغږۍ، پلورل شوې نجلۍ بېرته خپلې کورنۍ ته ستنه کړل شوې ده.
د ملګروملتونو سرمنشي انتونیو ګوترېش د اسلامي امارت له لوري د نجونو او هلکانو پر مخ د ښوونځيو د پرانیستلو له اعلان څخه هر کلی کړی دی.
د افغانستان د ژورنالېستانو او رسنیزو بنسټونو فدراسیون وايي، د اسلامي امارت له لوري د طلوع نیوز د درېوو کارکوونکو نیونه ناقانونه عمل دی. د یاد بنسټ په خبرپاڼه کې راغلي، په داسې حال کې چې نن د خبریال ملي ورځ ده، خو بهرام امان په زندان کې دی او خبریال باید خپله ورځ په زندان کې ونه نمانځي.
له روسیې سره د چین د مرستو په اړه د اندېښنو پر دوام د امریکا ولسمشر جو بایډن له خپل چیني سیال شي جین پېنګ سره نن ټیلیفوني خبرې کوي.
دواړه مشران داسې مهال خبرې کوي چې امریکا پر چین فشار راوستی، څو پر اوکراین د روسیې د برید د ملاتړ لپاره له مسکو سره مرسته ونهکړي.
د طلوع نیوز خصوصي ټلویزیون یوه مخکیني مسوول تایید کړې چې د ا.ا لهخوا پرون د دغه ټلویزیون له درېوو نیول شویو کارکوونکو څخه دوه یې بېرته خوشې شوي دي.
لطفالله نجفيزاده په یوه ټویټر پیغام کې ویلي، د طلوع نیوز خبري څانګې رییس خپلواک ساپی او د ټلویزیون حقوقي سلاکار له پوښتنو وروسته بېرته خوشې شوي، خو ویاند بهرام امان لاهم له ا.ا سره بندي دی.
سلاموطندار ته په طلوع نیوز کې يوې باوري سرچينې تاييد کړه چې د اسلامي امارت استخباراتو يې درې همکاران نامعلوم ځاى ته بيولي دي.
د خبریالانو ورځې له رارسېدو سره هم مهاله، د افغانستان د ژورنالیستانو او رسنیزو بنسټونو فدراسیون په ۱۴۰۰ کال کې د رسنیو فعالیت څرنګوالي په اړه د خپلې ټول پوښتنې پایلې خپرې کړې.
په کندهار کې نن پنجشنبه د بېنوا لوړو زدهکړو موسسې څخه ۱۹۳ نجونې او هلکان د انجنیري او کمپیوټر ساینس پوهنځیو څخه فارغ شول.
د کابل د امنیې قومندانۍ ویاند خالد ځدراڼ نن د دغه بنسټ د تېرو ۶ میاشتو لاسته راوړنو د وړاندې کولو پرمهال وویل، یاده موده کې یې کابل ښار او ولسوالیو کې ۲ زره او ۱۸۰ کسان د بېلابېلو جرمونو په تور نیولي چې پهکې ځینې مشهور مجرمین هم شامل دي.
د افغانستان د ژورنالیستانو او رسنیزو بنسټونو فدراسیون د خبریال ملي ورځې په ویاړ د څه باندې ۴۰۰ خبریالانو او د رسنیو کارکوونکو له ډلې ۲۰ هغه په بېلابېلو کټګوریو کې د کال د غوره خبریال او د رسنیو کارکوونکو په توګه ونومول چې د یوې رقابتي پروسې له لارې یې نوملیکنه کړې وه او پهکې بریالي شوي وو.
د چین د سوداګرۍ وزارت ویاند ګایو فنګ ویلي چې یاد هېواد به له روسیې او اوکراین سره خپلو عادي سوداګریزو او اقتصادي همکاریو ته دوام ورکړي.
د افغانستان لپاره د اروپايي ټولنې سفیر وان برانټ له افغان شخصیتونو سره د اړیکې او بېرته راستنېدو کمېسیون د جوړېدو په تړاو د اسلامي امارت له پرېکړې هرکلی کړی دی. برانټ نن پنجشنبه سهار پر خپل ټویټرپاڼه لیکلي، که چېرته د اسلامي امارت دغه پېکړه رښتیا وي، نو دا به د راتلونکي ټولګډونه حکومت د رسمیت پېژندنې پر لور لار اسانه کړي.
د افغانستان او اوکراین یوشمېر ښځو په یوې ناسته کې له نړیوالې ټولنې غوښتنه وکړه چې د دواړو هېوادونو د ښځو، سولې او امنیتي وضعیت ته پام وکړي.
د هند د خصوصي سکټور یوه سوداګر په لومړي ځل د پاکستان او په افغانستان کې د اسلامي امارت تر واکمنۍ لاندې د بار وړونکو موټرو پرمټ ازبکستان ته خپل سوداګریز توکي صادر کړي دي. په ورته مهال پاکستاني چارواکي ویلي چې دا تجارتي معامله په بشپړ ډول په خصوصي ډول ترتیب شوې او د هېڅ هېواد حکومت په کې دخیل نه دی.
د غور د کڼو ښوونځي زدهکوونکو د دغه ولایت د محلي مسوولانو په حضور کې خپل لاسي صنايع او لاسته راوړنې په يوه نندارتون کې نندارې ته وړاندې کړې. په دې نندارتون کې د غور د کڼو د مسلکي ښوونځي ۲۶ زدهکوونکو ګډون کړی و، چې له دې ډلې ۱۵ تنو د ساینسي علومو په برخه کې، څلورو په مسلکي برخه کې، پنځو تنو د لاسي صنایعو په برخه کې او دوو نورو د نقاشۍ او عکاسۍ په برخه کې خپلې لاسته راوړنې نندارې ته وړاندې کړې.
د امریکا غږ د راپور له مخې، د امريکا د متحدو ایالاتو په مرکز واشنګټن ډي سي کې د افغانستان سفارت او د نیویارک او لاس انجلس په ښارونو کې یې قونسلګرۍ وتړل شوې.
