وروسته له هغې چې پاکستان، ترکمنستان، قطر او روسیې د اسلامي امارت یوشمېر ډيپلوماټان ومنل، اوس چین هم په یوه ورته اقدام کې د اسلامي امارت ډيپلوماټان منلي دي. د سیاسي چارو کارپوهان وايي، کوم هېوادونه چې سفارتونه يې کابل کې فعالیت لري، اړ دي چې د چارو مخته وړلو لپاره د اسلامي امارت ډیپلوماټان هم په خپل هېواد کې ومني.
په کندهار کې یوشمېر سوداګر وايي چې د سپین بولدک له لارې پر سوداګریزو توکو د لوړې مالیې لګول او نورې ستونزې لامل شوي چې پر دغه لاره د سوداګرۍ کچه تر ۵۰ سلنې راکمه شي.
کندهار کې د ښاروالي چارواکي وايي چې په دغه ولايت کې د ملګرو ملتونو د هبېټاټ موسسې، په مالي لګښت ۸۴۰ وزګاره کسانو ته د دې ادارې ترمدیریت لاندې د کار زمينه برابره کړې ده.
امریکا په افغانستان کې د نشهيي توکو د کرکېلې مخنیوي په اړه د ا.ا د مشر هبتالله اخندزاده د فرمان هرکلی کړی او ویلي یې دي چې دغه پرېکړه باید عملي شي. د افغانستان لپاره د امریکا سفارت شاژدافیر یان مککري ویلي، افغانستان کې د نشهيي توکو کښت او تولید ناقانونه اعلانول، یو مثبت ګام دی او د عملي کېدو لپاره یې باید ګامونه واخیستل شي.
د سره صلیب نړیوالې کمېټې ویلي چې د ۲۰۲۲ کال د جنورۍ له پیله تراوسه، په افغانستان کې له جګړې څخه د پاتې ناچادو توکو او ماینونو د چادنې له امله څه باندې ۲۰۰ کسان وژل شوي او یا هم ټپیان شوي دي. دې کمېټې په یوه ټویټ کې لیکلي څه باندې ۲۰۰ کسان چې نیمايي یې ماشومان دي، د ناچادو توکو او ماینونو د چاودنې له امله مرګژوبله وراوښتې.
ملګرو ملتونو خبرداری ورکړی چې د افغانستان د خلکو د ژوند احیا لپاره د پیاوړي پروګرام پرته، ستر بشري ناورین ته رسېدنه ستونزمنه ده.
د هرات اوسېدونکي او فرهنګیان وايي چې د دغه ولایت له ۶۰سلنه ډېر تاریخي ځایونه ویجاړ شوي او که بیارغاونې ته یې پام ونه شي په بشپړ ډول به لهمنځه ولاړ شي. هغوی وایي، د تاریخي اثارو او ځایونو شتون د هېواد د هویت ښکارندوی کوي او له مسوولانو څخه غواړي چې د دغو لرغونو ځایونو ساتنه وکړي.
د عامې روغتیا وزارت مسوولان وايي چې د روان میلادي کال د لومړیو دوو میاشتو په پرتله په تېره میاشت کې په ټول هېواد کې د کورونا «اومېکرون» بڼې پېښې راکمې شوې دي.
د کابل ښار د تهیهمسکن سیمې د خوراکي توکو یوشمېر عمده پلورونکي وایي، د روسیې او اوکراین جګړې هېواد کې د خوراکي توکو پر بیو اغېز کړی او له شاوخوا دوو اوونیو راهیسې، د خوراکي توکو بیې مخ په لوړېدو دي.
وروسته له هغې چې د اسلامي امارت مشر هبتالله اخندزاده د یوه فرمان په صادرولو سره په ټول هېواد کې د نشهيي توکو پر کښت بندیز ولګاوه، د هېواد په سوېلي ولایتونو کې د نشهيي توکو یوشمېر کاروباریان وايي چې د یاد فرمان له صادرولو راهیسې د نشهيي توکو بیې دوه برابره شوې دي.
د افغانستان لپاره د امریکا ځانکړی استازی وایي چې له پخواني ولسمشر حامد کرزي سره یې د نجونو ښوونځیو پر بیاپرانستلو او د افغانستان د راتلونکې د ټاکلو لپاره د یوه مشورتي پروګرام د جوړولو اړتیا په اړه خبرې کړې دي. د نوموړي په وینا، له میلیونونو کورنیو سره یوځای کېږي چې د اسلامي امارت له پرېکړې څخه خپله ژوره ناهیلي څرګنده کړي.
د ملګرو ملتونو د خوړو او کرنې سازمان یا «FAO» ویلي، نیوزیلنډ د افغانستان په څلورو ولایتونو کې څه باندې ۹۴زره افغان کروندګرو سره د دوه میلیونه ډالرو مرستې اعلان کړی دی. دغه سازمان په یوې خبرپاڼه کې ویلي، یاده مرسته کې اصلاح شوي تخونه او نغدې پیسې شاملې دي چې د ننګرهار، کندوز، پروان او میدان وردګ کروندګرو باندې به ووېشل شي.
په ننګرهار کې د اسلامي امارت ځايي مسوولان وايي چې په دغه ولایت کې د امنیت ټينګښټ په موخه له تېرو دوو ورځو راهیسې د کورونو د پلټنې عملیات پیل کړي دي.
هلمند کې د وروستیو سیاسي تحولاتو راپدېخوا بېوزلي، وزګارتیا او نورې بېلابېلې ستونزې لامل شوي چې ځوانان خپلې لوړې زدهکړې په نیمه کې پرېږدي.
د پاکستان لوی درستیز جنرال قمر جاوید باجوه اسلاماباد کې د امنیتي مذاکراتو په نوم غونډې ته ویلي، که افغانستان سره مرسته ونه شي، نه یوازې د کډوالۍ بحران به زیات شي، بلکې ترهګرو ته به هم فرصت برابر شي چې غښتلي او ان د سپتمبر د ۱۱مې پېښې په څېر به بله پېښه رامنځته شي.
د پاکستان ولسمشر عارف علوي د عمرانخان په غوښتنه وروسته له هغې د دغه هېواد پارلمان منحل کړ چې نن پارلمان د لومړي وزیر عمرانخان پر ضد د اپوزېسیون له لوري وړاندې شوې د نه باور طرحه رد کړه.
