د ملګرو ملتونو د خوړو نړیوال پروګرام یا WFP په افغانستان کې د بېوزلۍ کچې د لوړېدو په اړه اندېښنه څرګنده کړې او ویلي یې دي چې اوس شاوخوا شل میلیونه افغانان د اړتیا وړ خوراکي توکو ته لاسرسی نه لري. په ورته وخت کې یوشمېر کابل ښاریان هم هېواد کې د وزګارتیا او بېوزلۍ کچې زیاتوالي اندېښمن کړي او وايي، اسلامي امارت باید خلکو ته د کار اسانتیاوې برابرې کړي.
له افغانستان سره د نړیوالې ټولنې د بشري مرستو په دوام، نن «د غويي ۲۴مه، د یکشنبې ورځ» د ۴۰ میلیونه نغدو ډالرو یوه کڅوړه کابل ته را رسېدلې ده.
په روان زېږدیز کال کې د ګوزڼ ناروغي د واکسین د کمپاین درېیم پړاو نن (د غويي ۲۴مه، د یکشنبې ورځ) په هرات کې پیل شو. د هرات د عامې روغتیا ریاست مرستیال آصف کبیر سلاموطندار ته ویلي چې یاد کمپاین ملاتړکوونکی دی او پر مهال به یې د هرات ښار په ګډون، د شینډنډ ولسوالي او په مسلخ او شیدايي کمپونو کې د کورنیو بېځایه شویو ماشومان واکسین شي.
د سیاسي چارو شنونکي کندهار ته د قطر د لوړپوړي پلاوي سفر او هلته د اسلامي امارت له لوړپوړو چارواکو سره یې د لیدنې په اړه وايي، دغه سفر د نړیوالې ټولنې د هغه پیغام رسولو په موخه و چې په دوحه کې د ملګرو ملتونو په وروستۍ غونډه کې یاد شوی و. دغه پلاوي په کندهار کې له رییسالوزرا محمدحسن اخوند په ګډون، له یوشمېر چارواکو خبرې کړې دي.
یوشمېر افغانان په حکومتي ادارو کې پر وخت د خپلو کارونو نه ترسره کېدو په اړه شکایت کوي او وايي، د خپلو کارونو لپاره څو ځله بېلابېلو ادارو ته ورځي، خو چارې یې پر وخت سر ته نه رسېږي.
د هوايي دهلېز له لارې د سوداګریزو توکو د لېږد رالېږد اسانتیا په موخه د مفید لوجستیکي ګروپ یوې هوايي کارګو خپل فعالیت پیل کړ.
د دغه شرکت یو مسوول عبدالکریم عارفي وايي، له دې وروسته به له افغانستان څخه سوداګریز توکي په عمده او پرچون ډول په بېلابېلو بیو صادر شي.
یوشمېر هغه ناروغان او ناروغلرونکي چې د درملنې لپاره د جوزجان ولایتي روغتون ته ورغلي وايي، په دغه روغتون کې د قابلو کمښت لامل شوی چې ناروغانو ته لازم روغتیايي خدمتونه ونه رسېږي.
د نورستان محلي مسوولان وايي چې پرون ناوخته د دغه ولایت په دواب ولسوالي کې یو موټر چپه شوی چې له کبله یې یو کس مړ او څلور نور ټپیان شوي دي.
د ګوزڼ ناروغي د له منځه وړلو بېړني عملیاتي مرکز مسوول نېکوليشاه مومن سلاموطندار ته ویلي چې په ننګرهار کې یې د دې ناروغي یوه مثبته پېښه ثبت کړې ده.
د نوموړي په وینا، یو څلور کلن ماشوم په بټيکوټ ولسوالي کې پر دې ناروغي اخته شوې ده. هغه وايي چې دا په روان ۲۰۲۳ کال کې د ګوزڼ لومړنۍ پېښه ده چې په هېواد کې ثبتېږي.
د هند کرېکټ غوره لیګ یا ایپياېل سیالیو په لړ کې نن دوه لوبې کېږي چې لکناو له حیدراباد او ډیلي له پنجاب سره د سیالۍ ډګر ته ځي.
ټاکل شوې چې د د لکناو سوپر جایټنز او سنرایزر حیدراباد لوبډلو ترمنځ سیالي نن له غرمې وروسته ۲:۳۰ بجې د حیدراباد په راجېف ګاندي لوبغالي کې ترسره شي.
د تخار محلي مسوولان وايي چې دغه لایت کې د اورلګېدنې له کبله یو ماشوم سوځېدلی او مړ شوی دی.
د تخار د امنیې قومنداني ویاند عبدالمبین ساپی سلاموطندار ته وايي چې اورلګېدنه پنجشنبه د غويي ۲۱مه د ینګيقلعه ورزشي چمن ته نږدې د تېلو په یوه ټانک کې د جنراټور برښنا شارټۍ له کبله رامنځته شوې چې له کبله یې یو ماشوم مړ شوی او دوه نور ټپیان شوي دي.
هلمند کې د غوښن چرګانو یوشمېر فارم لرونکي وایې چې دغه ولایت کې څه باندې ۱۰۰۰ د چرګانو فارمونه فعال دي چې پهکې شاوخوا ۶۰۰۰ کسانو ته د کار زمینه برابره شوې ده.
د غوښن چرګانو یاد فارم لرونکي سلاموطندار ته وايي چې هره ورځ، لسګونه زره کیلو غوښه د هلمند ترڅنګ نورو ولایتونو ته هم صادروي.
په دې وروستیو کلونو کې جګړو څخه د پاتې ناچاوده توکو د چاودنې له امله د ملکيانو په ځانګړې توګه د د ماشومانو ژوند د مرګ له ګواښ سره مخ کړی دی.
د تېر یوه کال په ترڅ کې جګړو څخه د پاتې ناچاوده توکو چاودنو کې یوازې د غزني واغظ ولسوالي کې د ښځو او ماشومانو په ګډون شپږو کسانو ته مرګژوبله اوښتې ده.
د غور محلي مسوولان وايي چې دغه ولایت کې د نشهيي توکو د تولید په یوه کارخونه کې د اورلګېدنې له امله یو کس مړ شوی او درې نور ټپیان شوي دي.
پېښه تېره شپه د یاد ولایت د شهرک ولسوالي اړوند کمنج سیمه کې رامنځته شوې ده. د غور د اطلاعاتو او فرهنګ رییس محمدحماس زیاته کړې چې یادې فابریکې په پټه فعالیت کاوه.
بدخشان کې محلي سرچینې سلاموطندار ته وايي چې د دغه ولایت په «درایم» ولسوالي کې د کوکنارو کښت د لهمنځه وړو پر سر د نښتې له کبله څلور کسان وژل شوي دي.
یونېسف پرون پنجشنبه د غويي ۲۱مه پر خپله ټوېټرپاڼه لیکلي چې د روغتیايي امکاناتو د زېرمې لپاره پراختیايي بودیجه نهلري او امکان شته چې افغانستان کې زرګونه ماشومان د شدیدې خوارځواکۍ له امله خپل ژوند له لاسه ورکړي.
یاد بنسټ افغانستان کې د بشردوستانه مرستو د وېش لپاره پر وخت او د کافي بودیجې غوښتنه کړې ده.
