اسراييلي چارواکي وايي چې په تل ابیب کې د پنجشنبې پر ماښام دوو وسله والو کسانو په خلکو د چړو ګوزارونه کړي چې درې کسان یې وژلي او څلور نور یې ټپيان کړي دي.
چارواکي وايي چې بریدګر له سیمې څخه په یو موټر کې تښتېدلي چې پوليس يې د نیولو هڅې پیل کړي دي.
د سلاموطندار پښتو فېسبوکپاڼه وڅارئ
برید د اسراييل د خپلواکۍ پر ورځ شوی او دا په دې وروستیو اوونیو کې د خپل ډول تازه برید بلل کېږي. د حماس ډلې دغه بريد ستايلي او ويلي يې دي: «د الاقصی پر جومات بريد بې ځوابه نه پاتې کېږي.»
د امریکا د بهرنیو چارو وزارت دا یو ترهګریز برید بللی دی. د ياد وزارت ویاند نېډ پرایس ويلي چې دا «د نفرت پاروونکو ترهګریزو بریدونو لړۍ ده چې اسراييل ته یې ټکان ورکړی» دی.
په وروستیو کې د اسراييلو او فلسطينيانو ترمنځ تاوتریخوالی د تېرو کلونو په پرتله ډېر شوی دی. په پنځو بریدونو او تاوتریخوالي کې لږ تر لږه ۱۸ اسرايیلیان او ۳۰ فلسطینیان وژل شوي دي.
