د هند، روسیې او چین د بهرنیو چارو وزیرانو پرون د یوې انلاین غونډې په ترڅ کې له افغانستان څخه د نشهيي توکو د قاچاق زیاتېدو په اړه اندېښنه څرګنده کړه.
د چین بهرنیو چارو وزیر وانګيي، د هند بهرنیو چارو وزیر اسجي شنکر او د روسیې بهرنیو چارو وزیر سرګي لاوروف یوې انلاین غونډه کې افغناستان څخه د نشهيي توکو د قاچاق زیاتېدل، د سیمې د هېوادونو امنیت لپاره یو جدي ګواښ وباله. د دغو درېوو هېوادونو ګډه اعلامیه کې ویل شوي چې د نشهيي توکو قاچاق د ترهګرو ډلو بودیجه تامینوي.
د سلاموطندار پښتو فېسبوکپاڼه وڅارئ
په ورته مهال یوشمېر سیاسي کارپوهان هم د دغو هېوادونو د اندېښنو په تایید سره وايي، ترهګرې ډلې د نشهيي توکو قاچاق له لارې میلیاردونه ډالره ګټه ترلاسه کوي او له دغې لارې خپلو موخو ته رسېږي. دوی په دې باور دي چې هېواد کې د لوږې زیاتېدو، د مخدره توکو کښت، تولید او قاچاق زیات کړی دی.
د پوهنتون استاد اکرم عارفي وايي چې نشهيي توکي د ترهګرو ډلو مهمه سرچینه ده او له همدې لارې خپل ځانونه پیاوړي کوي. نوموړی زیاتوي چې په افغانستان کې وروستیو تحولاتو ته په کتو د سیمې او نړۍ هېوادونه له نوي حکومت څخه هیله لري چې د نشهيي توکو د کښت، تولید او قاچاق د مخنیوي په برخه کې اوچت ګامونه پورته کړي.
په ورته مهال د چارو یو بل شنونکی مصطفی عليزاده بیا وايي چې په تېرو شلو کلونو کې نشهيي توکي د طالبانو سربېره د نورو کوچنیو ډلو لکه جیش محمد او القاعدې لپاره د عاید مهمه سرچینه وه او د نړۍ له هېوادونو سره اوس دا اندېښنه پیدا شوې چې ښايي اسلامي امارت د نشهيي توکو د قاچاق له لارې د سیمې او نړۍ هېوادونو ته په یوه ستر ګواښ بدل شي.
دغه اندېښنې داسې حال کې مطرح کېږي چې ملګروملتونو په خپل یوه تازه رپوټ کې په افغناستان کې د مخدره توکو د تولید له زیاتواي خبر ورکوي. دغه رپوټ کې ویل شوي چې سږ کال د تېر کال د ورته مودې په پرتله افغانستان کې د تریاکو د تولید کچه ۸ سلنه لوړه شوې ده.
