نن د اکتوبر۱۶مه د خوړو نړیوالې ورځې سره برابره ده. دغه ورځ نړۍ کې پر داسې مهال نمانځل کېږي چې افغانستان کې میلیونونه کسان له سختې لوږې او بېوزلۍ سره لاس او ګرېوان دي.
د افغانستان په اړه د ملګروملتونو د وروستي راپور پربنسټ، دا مهال ۱۹میلیونه افغانان په کافي اندازه خوړو ته لاسرسی نهلري چې د دغه سازمان اندېښنې یې راپورته کړي دي.
بلخوا افغانستان کې د افغاني سرې میاشتې ټولنې چارواکي وايي چې دا مهال هېواد کې تر لس میلیونه کسان بېړنیو مرستو ته اړتیا لري.
د افغاني سرې میاشتې ټولنې ویاند عرفان الله شرفزي دغه راز سلاموطندار ته ویلي، هېواد کې له نیمایي ډېر خلک له بېوزلي او لوږې سره مخ دي.
په ورته وخت کې د اقتصادي چارو کارپوهان افغانستان کې د اوسني وضعیت یوازینی لامل وزګارتیا یادوي او ټینګار کوي چې د کاري زمینې له پراخېدو سره به هېواد کې د بېوزلي اوسنۍ کچه ټیټه شي.
اقتصادي کارپوه عبدالبنصیر رشتیا وايي، افغانستان سره اوسنۍ بشري مرستې په اوږمهاله توګه د هېڅ درد دوا نشي کېدای او په وینا یې، د بېوزلي لهمنځه وړو یوازینۍ لار هېواد کې پانګهاچونه او کارموندنه ده.
نوموړي وویل:«هېڅ هېواد په مرستو او وارداتوهېڅکله ځان بساینې ته نه رسېږي. بغیر له دې چې د کارکولو فرصتونه برابر شي او دا هغه وخت شونې ده چې پانګه اچونه وشي.»
دا په داسې حال کې ده چې د خوړو نړیوال پروګرام له لوري افغانستان د لوږې د نړیوال شاخص په درجه بندۍ کې د ۱۲۱ هېوادونو له ډلې په ۱۰۹ ځای کې راغلی دی.
