په میدان وردګ کې د چاودنې له امله د یوې کورنۍ یو ماشوم وژل شوی او بل ټپي دی. دغه پېښه پرون مازدیګر د میدان وردګ د سیداباد ولسوالي اړوند په لوړې کلي کې رامنځته شوې ده.
د یاد ولایت د عامې روغتیا ریاست کې یوې سرچینې سلاموطندار ته ویلي چې د پېښې قربانیان خور او ورور دي.
د سلاموطندار پښتو فېسبوکپاڼه وڅارئ
د سرچینې په وینا، د پېښې قرباني روغتون ته پر لاره ساه ورکړې او ټپي ماشومه د ښې درملنې په موخه کابل ته لېږدول شوې ده. د ټپي ماشومې روغتیايي وضعیت د اندېښنې وړ ښودل شوی دی.
دا لومړی ځل نه دی چې په دغه ولایت کې له جګړو څخه د پاتو ناچاودېدونکو توکو د چاودنې له امله خلکو ته مرګژوبله اوړي، بلکې له دې وړاندې هم د هېواد په یوشمېر ولایتونو کې ورته پېښې رامنځته شوي دي.
