د بادغیس محلي مسوولان د سختې واورې اورېدو له امله د دغه ولایت د ټولو مواصلاتي لارو د تړل کېدو خبر ورکوي.
د بادغیس د ځمکني ټرانسپورټ مدیر محمدعمر عزت وايي، په دغه ولایت کې د سختې او دوامدارې واورې د اورېدو له امله د قلعه نو-هرات لویې لارې په ګډون، د ټولو ولسوالیو لارې تړل شوې دي.
د بادغیس د ځمکني ټرانسپورټ مدیر زیاتوي چې له تېرې شپې راهیسې یې د ټولو خواوو خلکو ته لارښوونه کړې، څو د وضعیت تر ښهوالي او بلې خبرتیا پورې له تګراتګ څخه ډډه وکړي.
د نوموړي په وینا، د بادغیس د واورې پاکولو او ویلې کولو ډلې هڅه کوي چې لویې لارې پاکې او د خلکو پر مخ یې پرانېزي.
له تېرو څلورو ورځو راهیسې د بادغیس په مرکز او ولسوالیو کې سخته واوره اوري او د دوام وړاندوینه یې هم شوې ده.
