یوشمېر کابل ښاریان په دوحه کې د افغانستان په اړه د غونډې پیلېدو سره سم وايي، تمه لري چې په دې غونډه کې به د افغانستان روان کړکېچ ته د پای ټکی کېښودل شي او د دوی ژوند به ورسره مثبت بدلون ومومي.
د کابل ښار اوسېدونکې نجمه نبيزاده چې په يوه دولتي ښوونځي کې د دولسم ټولګي زدهکوونکې ده وايي، افغان نجونې او ښځې تمه لري چې د دوحې غونډه کې به یې پر زدهکړو او کار بحث وشي او دوی ته به یې اسانتیاوې برابرې شي.
د سلاموطندار پښتو فېسبوکپاڼه وڅارئ
هغه زیاتوي: «له ګاونډیو هېوادونو او ملګرو ملتونو څخه مو تمه ده چې اسلامي امارت ته قناعت ورکړي، څو د ښځو پر زدهکړو او کار لګېدلي بندیزونه لرې کړي؛ ځکه هېڅ ټولنه د ښځینهوو له ښوونې او روزنې او لوړو زدهکړو پرته پرمختګ نهشي کولای. دا غونډه باید زموږ د بنسټیزو حقونو ترلاسه کولو ته لاره هواره کړي.»
نګینه د کابل ښار د فتحالله کلا اوسېدونکې ده. نوموړې له ملګرو ملتونو او د دوحې غونډه کې د ګډونوالو هېوادونو له استازیو غواړي چې افغانستان کې د میلیونونو نجونو او ښځو اندېښنو ته د پای ټکی کېږدي.
د هغې په وینا، یاده غونډه کې باید د نجونو پر مخ د ښوونځیو او پوهنتونونو د پرانېستل کېدو موضوع روښانه شي او ښځو ته اجازه ورکړل شي چې زدهکړې او کار وکړي.
په همدې حال کې ټولنیز فعال بسمالله یاوري هم وايي چې د ټولګډونه حکومت جوړېدل او افغانستان کې د لګېدلیو محدودیتونو له منځه وړل هغه څه دي چې افغانان یې د دوحې له غونډې تمه لري.
د پوهنتون استاد سرور جعفري بیا هیله څرګندوي چې ملګري ملتونه او د افغانستان ګاونډي هېوادونه به د دوحې غونډه کې له افغانستان سره مرسته وکړي، څو له شته ستونزو څخه د وتلو لپاره یوې دایمي حللارې ته ورسېږي.
د ملګرو ملتونو په مشري د دوحې دوهورځنۍ غونډه نن پیل شوه او سبا به هم دوام وکړي. په دې غونډه کې د ۲۲ هېوادونو او دوو نړیوالو سازمانونو استازي افغانستان کې پر بشري حقونو، امنیتي او سیاسي وضعیت خبرې اترې کوي.
