د جوزجان د اقچې ولسوالي په بازار کې د لومړي ځل لپاره د غالیو د پراسېس یو مرکز جوړېږي. د عابد افغان شرکت مشر ذبېحالله زاهد چې دا پروژه عملي کوي، وايي چې دغه مرکز د ۱۵۰ زره امریکايي ډالرو په ارزښت چې د کډوالو په چارو کې د ملګرو ملتونو عالي کمېشنرۍ UNHCR لهخوا ورکول کېږي، پر دوه زره متره مربع ځمکې په دوو پوړونو کې جوړېږي.
هغه وايي، یاده پروژه په شپږو میاشتو کې بشپړېږي او د کار په پیل سره یې د ۱۲ سوو کسانو لپاره د کار اسانتیاوې برابرې شوې دي. د زاهد په وینا، مخکې به د افغانستان ټول اومه توکي پاکستان او ایران ته صادرېدل او هغوی به بیا په خپل نوم نورو هېوادونو ته صادرول، خو اوس به دغه کار دلته کېږي.
د جوزجان والي محمداسماعیل راسخ هم وايي چې د دغه مرکز په جوړېدو سره به په شمال کې تولید شوې غالۍ پراسېس او بیا به نړیوالو بازارونو ته وړاندې شي. د نوموړي په خبره، د یاد مرکز جوړول د شمالي ولایتونو د اوسېدونکو لپاره مادي او معنوي ارزښت لري.
د اقچې ولسوالي یوشمېر اوسېدونکي هم د غالیو د پراسېس د دغه مرکز د جوړېدو هرکلی کوي او وايي، ترې دې وروسته به د پاکستان په نوم د افغانستان د غالیو صادرېدو مخه ونیول شي.
بلهخوا د اقچې ولسوالي د کډوالو ښارګوټي د پراختیايي شورا مشر محمدالله وايي، هر کال زرګونه متره مربع افغاني غالۍ په پاکستان کې پراسېس او بیا نړیوالو بازارونو ته وړاندې کېږي.
د سلاموطندار پښتو فېسبوکپاڼه وڅارئ
هغه وايي، د یاد مرکز په جوړېدو سره به افغاني غالۍ همدلته پراسېس او د نړیوالو بازارونو لپاره چمتو کېږي چې خلکو ته یې ډېره ګټه اوړي.
په جوزجان کې د غالیو یوشمېر سوداګر بیا وايي، سره له دې چې افغاني غالۍ ښه کیفیت او ښه نوم لري، خو مناسب بازار نه لري.
