د چیچنیا مسلمان مشر رمضان قدیروف ویلي چې خپل درې زامن به له روسي ځواکونو سره یوځای د اوکراین پر وړاندې د جګړې ډګر ته واستوي.
قدیروف زیاته کړې چې زامن یې ۱۴، ۱۵ او ۱۶ کاله عمر لري او له کوچنيوالي یې پوځي روزنه ترلاسه کړې ده.
هغه همداراز ویلي، د دې وخت رارسېدلی چې زامن یې په ريښتینې توګه جګړه تجربه کړي او زه یې د دې هیلې هرکلی کوم. قدیروف پرون دوشنبه د تلې یوولسمه پر خپل ټېلېګرام د خپلو زامنو یوه ویډیو خپره کړې چې هغوی بېلابېلې وسلې کاروي او مجهیز ښکاري.
قدیروف لیکلي: «زامن به مې ژر د جګړې لومړۍ کرښې ته لاړ شي». هغه وايي چې زامن یې، احمد، علي او ادم له «ماشومتوب راهېسې د جګړې لپاره روزل شوي» او دا «ټوکه نه» ده.
رمضان قدیروف د روسیې ولسمشر ولادیمیر پوتین ته نږدې کس دی او د اوکراین په جګړه کې د نوموړي کلک ملاتړ کوي.
