د افغانستان د ملي کنګرې ګوند رییس لطیف پدرام نن په کابل کې یوې خبري غونډې ته وویل، ښايي د مسکو په جوړېدونکې غونډه کې به د سولې انتقالي حکومت او د دغه حکومت د رییس پر ټاکلو بحث وشي.
د نوموړي په وینا، د سولې انتقالي حکومت رییس به نه ولسمشر محمداشرف غني او نه هم د طالب ډلې غړی وي.
خو د ملي روغې جوړې شورا غړی شهزاده شاهد وايي، تر اوسه د مسکو غونډې اجندا نه ده روښانه، خو په وینا یې، پر افغان سولې له بحث پرته به بل څه نه وي.
بلهخوا په افغانستان کې د چین سفیر په یوه مرکه کې ویلي چې د هېواد یو استازی یې د مسکو په غونډه کې ګډون کوي. هغه هم زیاته کړې چې تر اوسه د یادې غونډې اجندا په اړه معلومات نه دي ورکړل شوي.
ټاکل شوې د پنجشنبې په ورځ په مسکو کې د سولې په اړه د افغان دولت، طالب ډلې او یوشمېر نورو هېوادونو د استازو ترمنځ ګډه غونډه جوړه شي.
په دې غونډه کې د ملي روغې جوړې شورا د رییس عبدالله عبدالله په مشري یو ۱۶ کسیز پلاوی د افغانستان په استازولي ګډون کوي. په دغه پلاوي کې د پخواني ولسمشر حامد کرزي، ګلبدین حکمتیار او عبدالرشید دوستم په ګډون، د دولت د سولې مرکچي پلاوي ځینې غړي او د سیاسي ګوندونو استازي ګډون شامل دي.
په قطر کې د طالب ډلې ویاند ډاکټر نعیم هم پرون وویل چې د ملاعبدالغني برادر په مشري به د دې ډلې یو لس کسیز پلاوی د مسکو په غونډه کې ګډون وکړي.
