نړیوال بانک د افغانستان اقتصادي وضعیت په اړه تازه رپوټ کې ویلي، ۲۰۲۱ ته په پرتله تېر ۲۰۲۲ کال کې د افغانستان صادرات زیات شوي او افغانیو هم د بهرنیو اسعارو پر وړاندې خپل نسبي ثبات ساتلی دی.
رپوټ کې راغلي چې افغانستان د ۲۰۲۲ کال جنوري څخه تر نومبر میاشت پورې د یو میلیارد او ۷سوه میلیون ډالرو په ارزښت توکي صادر کړي.
په ورته وخت کې د سوداګرۍ او صنعت وزارت ویاند جواد اخندزاده د نړیوال بانک شمېرې تاییدوي او وايي، تېر یوه کال کې د سوداګرو لپاره د اسانتیاوو رامنځ ته کول لامل شوي چې بهر ته د صادراتو کچه لوړه شي.
هغه سلاموطندار ته وویل: «سږکال مو صادرات په لومړیو نهو میاشتو کې یو میلیارډ او ۴۵۰ میلیونه ډالرو ته رسېږي. د جمهوریت په پرتله د صادراتو د کچې لوړوالی سوداګرو ته د اسانتیاوو رامنځته کول او نورو هېوادونو سره سوداګریزه راکړه ورکړه ده.»
په همدې حال کې د پوهنتون استاد او د نړیوال اقتصاد څېړونکی بهمن یوسفي وايي، افغانیو د نړیوالې ټولنې د نغدي مرستو له امله خپل ارزښت ساتلی او نړیوالو بازارونو کې د نفتو او خوراکي توکو د بیې ټيټېدل هم لامل شوي چې د انفلاسیون کچه کمه شي.
نوموړي وویل: «یوازینی هغه لامل چې د بهرنیو اسعارو پر وړاندې یې د افغانیو ارزښت ساتلی د نړیوالې ټولنې نغدي مرستې دي. د تورم نرخ چې مثبت ښودل شوی لامل یې نړیوال بازار کې د سوند او خوراکي توکو د بیو ټیټوالی دی او افغانستان هم ترې اغېزمن شوی دی.»
له دې سره، د اقتصادي چارو شنونکی تاجمحمد تلاش وايي، افغانستان کې وضعیت مخ په ښه کېدو دی او د صادراتو زیاتېدل به هم د وخت په تېرېدو سره د خلکو پر اقتصادي وضعیت اغېز وکړي.
نوموړي زیاته کړه: «فکر کوم چې د افغانستان اقتصادي وضعیت ښه لوري ته روان دی او نړیواله ټولنه ترې څارنه کوي چې د صادراتو زیاتېدل لامل کېږي چې تولید او خدمات زیات شي او خصوصي سکټور په پښو ودرېږي او په پایله کې یې د مالیاتو په اخیستو د دولت خزانې ته ګټه رسېږي.»
سلاموطندار پر ټوېټرپاڼه هم وڅارئ
ویل کېږي چې د جمهوري نظام په سقوط سره، د افغانستان اقتصادي نظام هم ټکنی شوی او د بېوزلۍ لمن تر پخوا لا پراخه شوې؛ هغه څه چې نړیوالو مرستو ته یې د افغانانو اړتیاوې تر بل هر وخت ډېرې کړي دي.
