د بلخ د ټرافیکو مدیریت مسوولان وايي، د روان لمریز کال پر مهال په دغه ولایت کې د ټرافیکي پېښو له کبله ۱۰۸ کسان مړه شوي او ۱۶۰ نور ټپیان دي.
د بلخ د ټرافیکو مدیر عبدالقیوم مبارز وایي، دغو کسانو ته د بلخ-جوزجان او بلخ-سمنګان پر لویو لارو د ۱۲۲ ټرافیکو پېښو له کبله مرګژوبله اوښتې ده.
ګړندی تګ، ټرافیکي اصولو په اړه نه پوهاوی او ورته نه پام، د سړکونو کوچنیوالی او پر لویو لارو د ټرافیکي نښو نه موجودیت هغه څه دي چې له کبله یې ټرافیکي پېښې کېږي او له کبله یې ګڼشمېر افغانانو ته مرګژوبله اوړي.
د بلخ د ټرافیکو مدیر زیاتوي: «روان کال د بلخ-جوزجان او بلخ-سمنګان پر لویو لارو ۱۲۲ ټرافیکي پېښې شوي چې له کبله یې ۱۰۸ کسان مړه او ۱۶۰ نور ټپیان شوي دي.»
په همدې حال کې د بلخ یوشمېر اوسېدونکي په دغه ولایت کې د ټرافیکي پېښو زیاتوالی د اندېښنې وړ بولي او له موترچلوونکو غواړي چې ټرافیکي اصول په پام کې ونیسي.
دا یوازې بلخ نهدی چې په دې وروستیو کې پهکې ټرافیکي پېښې کېږي، بلکې د هېواد په نورو ولایتونو کې هم وختناوخت ټرافیکي پېښې کېږي او له کبله یې ګڼشمېر هېوادوالو ته مرګژوبله اوړي.
