د سولې په چارو کې د دولت وزارت نن د بلخ ولایت په مزار شریف ښار کې د «جګړې اوښکې، د سولې مسکا» په نوم د تصویرونو د نندارتون پرانیسته وکړه.
د سولې په چارو کې د دولت وزارت د عامه پوهاوي رییس سیدضیا دانش وایي چې دغه نندارتون د جګړې او تاوتریخوالي د اړخونو ښودلو او په سوله کې له ژوند سره یې د پرتله کولو په موخه جوړ شوی دی.
د سلاموطندار پښتو فېسبوکپاڼه وڅارئ
د نوموړي په وینا، دغه نندارتون به په راتلونکو ورځو کې د مزارشریف ښار له یوشمېر سیمو سربېره په شمالي ولایتونو کې هم جوړ شي.
په ورته مهال د دغه نندارتون یوشمېر ګډونوال وایي، خلک له جګړې ستړي شوي او په هېواد کې د سولې غوښتونکي دي. د یاد نندارتون دوه ګډونوال عبدالشکور او مبینه وایي، دغه نندارتون د جګړې او تاوتریخوالي د درولو ښکارندويي کوي او مونږ ټول د تلپاتې سولې غوښتونکي یو.
د دوی په وینا، د جګړې له امله ډېری هېوادوالو کلونه کلونه اوښکې تویې کړي او اوس د دې وخت را رسېدلی چې د سولې په راتلو سره مسکا وکړي.
د «جګړې اوښکې، د سولې مسکا» د تصویرونو نندارتون په داسې مهال مزارشریف ښار کې جوړېږي چې اوس مهال د بلخ ولایت په ډېری ولسوالیو کې د افغان امنیتي ځواکونو او وسلهوالو طالبانو ترمنځ سختې جګړې روانې دي.
