ارګ وايي، ولسمشر محمد اشرف غني تېر ماښام د ناټو له عمومي منشي ينس سټولټنبرګ سره د سولې پروسې په اړه ټلفوني خبرې کړې دي.
د ناټو سرمنشي ینس سټولټنبرګ هم پر خپله ټوېټر پاڼه لیکي چې دواړو لوريو د افغانستان پر اوسني وضعيت خبرې کړې دي.
سټولټنبرګ ویلي چې د سولې خبرې اوږدې او سخته لار لري، ماتېدونکي دي؛ خو د سولې لپاره خورا ښه فرصت دی.
د ناټو سرمنشي ټینګار کړی چې ناټو د افغانستان امنیت ته ژمن دی.
له دې وړاندې د ناټو سرمنشي ويلي و چې افغانستان کې د نظامي حضور په اړه په برنامه کې بدلون شرايطو پورې تړلی دی.
ینس سټولټنبرګ همداراز ويلي و چې طالبان بايد پر خپلو ژمنو عمل وکړي او تاوتريخوالی کم کړي.
