د بدخشان ځايي مسوولان وايي، په یمګان ولسوالۍ کې د ځمکې ښوویېدنې له امله څلور کسانو ژوند بایللی.
د ۲۱۹ عمر ثالث فرقې د ښوونې او روزنې مدیر حافظ عبدالمتعال راسخ ویلي، دا پېښه نن جمعه له غرمې مخکې شاوخوا ۱۱:۱۵ بجې د یمګان ولسوالۍ «وجن اوشنګان علیا» کلي کې شوې.
د هغه په وینا، دغه تنکي ځوانان د تنور جوړولو لپاره د خټو او ګل راټولولو په حال کې وو چې ناڅاپه د ځمکې ښوویېدنې لاندې شول او ژوند یې له لاسه ورکړ.
ښاغلي راسخ زیاته کړې چې د پېښې د قربانیانو عمرونه ۱۰، ۱۳، ۱۵ او ۱۳ کاله دي.
ځايي اوسېدونکي وایي، د یمګان ولسوالۍ په غرنیو سیمو کې د ځمکې ښوویېدنې پېښې، په ځانګړي ډول د پسرلي په موسم کې، تل د خلکو ژوند له ګواښ سره مخ کوي.