د بهرنیو چارو وزارت سرپرست امیرخان متقي ویلي چې له نړیوالې ټولنې سره د اسلامي امارت تعامل د پراختیا په حال کې دی او ټاکل شوې چې افغانستان کې د یوشمېر هېوادونو سفارتونه بېرته پرانستل شي.
ملي راډیو ټلوېزیون د متقي له قوله پر خپله ټوېټرپاڼه لیکلي چې کابل له نړیوالې ټولنې سره د ډيپلوماټیکو اړیکو غوښتونکی دی او په همدې دلیل، یوشمېر هېوادونه غواړي چې کابل کې خپل سفارتونه بیاپرانیزي.
د سلاموطندار پښتو فېسبوکپاڼه وڅارئ
ملي راډیو ټلوېزیون لیکلي، متقي ټینګار کړی چې «نړۍ سره ښې اړیکې لرو او دغه اړیکې د پراختیا په حال کې دي. هیله کوو چې ډېرې لاستهراوړنې ولرو.»
ملي راډیو ټلوېزیون د هغو هېوادونه نومونه نه دي یاد کړي چې غواړي کابل کې خپل سفارت بېرته پرانیزي او نه یې هم د پرانستلو کره نېټه په ګوته کړې ده.
واک ته اسلامي امارت له بیارسېدو راهیسې ټولو هېوادونو کابل او په ولایتونو کې خپل سفارتونه او کونسلګرۍ وتړلې.
له هغه وروسته د ګوتو په شمېر هېوادونو لکه پاکستان، چین، ایران، روسیې، سعودي عربستان او په تازهګۍ سره هند په کابل کې خپل سفارتونه بیاپرانستل.
په ورته مهال ځینو بهرنیو هېوادونو بیا د افغانستان په سفارتونو کې د اسلامي امارت د ګوتو په شمېر استازي منلې دي.
