نن د ډسمبر درېیمه د معلولانو نړیواله ورځ ده. کابل ښار کې یوشمېر معلولان وايي چې د معلولیت له کبله له ګڼو اقتصادي ستونزو سره لاس او ګرېوان دي.
د کابل اوسېدونکې حسینا سلاموطندار ته وايي چې تېرو جګړو یې ۲۵ کلن ورور او دوه کوچنۍ خویندې معلولې کړي او اوس ناوړه اقتصادي وضعیت کې دي.
نوموړې وویل: «جګړو مو د کورنۍ درې غړي معلول کړي او اقتصادي ستونزو سره مخ یوو. د سره صلیب نړیوالې کمېټې مې ورور بوته، خو تراوسه یې ورسره مرسته نه ده کړې.»
په ورته مهال ۲۵ کلن عبدالباسط چې پر دوو پښو معلول دی، د کابل ښار د یوه سړک څنګ ته ناست دی او د خپلې کورنۍ د نفقې تامین لپاره د موبایل کارتونه پلوري.
هغه چې د ګرځېدو توان نهلري او د یوه خصوصي پوهنتون زدهکړیال دی چې د خپل ژوند بد اقتصادي وضعیت په اړه اندېښمن دی.
نوموړي وویل: «معلول کسان له ګڼو اقتصادي ستونزو سره لاس او ګرېوان دي او همداراز د کار او زدهکړو زمینه ورته نه ده برابره. له اسلامي امارت مو غوښتنه ده چې معلولو ته د کار او زدهکړو زمینه برابره کړي.»
په ورته وخت کې د ملګروملتونو د بشري مرستو د همغږۍ دفتر وايي، د افغانستان وګړي شاوخوا ۱۵په سلو کې د معلولیت د یوه ډول درلودونکي دي چې له نورو ډېر مرستو ته اړتیا لري.
خو د اسلامي امارت د شهیدانو او معلولانو وزارت ویاند مفتي فیصل خاموش وايي، شاوخوا ۱۵۰زره معلولان ورسره ثبت دي چې په دوامداره ټوګه خپل حقوق ورکول کېږي.
نوموړي وویل: «تراوسه ۱۵۰زره معلولان پېژندل شوي او دغه وزارت د معلولانو د وړتیا او ظرفیت لوړولو لپاره شپږ بېلابېلو برخو کې د حرفهيي زدهکړو څانګې رامنځته کړي، څو معلولان ټولنه کې د کار کولو توان پیدا کړي.»
سلاموطندار پر ټوېټرپاڼه هم وڅارئ
د یادونې وړ ده چې د ملګروملتونو سرمنشي انټوني ګوټرېش هم د معلولانو نړیوالو ورځې په مناسب پر خپله ټوېټرپاڼه یوه پیغام کې ویلي، د نړۍ په کچه د دغه کمشمېر کسانو لاسنیوی مهم او هېوادونه اړ دي چې همکاري ورسره وکړي.
