د بدخشان د کوهستان ولسوالي اوسېدونکي وايي، د یفتلبالا او کوهستان ولسوالیو ترمنځ د نښلېدونکي ۱۸ کیلومټره سړک د بیارغونې چارې یې پیل کړي دي.
دغه سړک چې «دربندک» سیمه کې جوړېږي، ۷۰۰زره افغانۍ لګښت پرې راځي چې د سیمې د خلکو له لوري ورکول کېږي.
د سلاموطندار پښتو فېسبوکپاڼه وڅارئ
د کوهستان ولسوالي د اوسېدونکو په وینا، دغه سړک تېرکال د یادې سیمې د اوسېدونکو له لوري د څلور میلیونه افغانیو په لګښت جوړ شوی و.
څه موده وړاندې هم د بدخشان راغستان ولسوالي اوسېدونکو په خپل شخصي لګښت دغه ولسوالي کې د ۱۵کیلومټره سړک د رغونې چارې پیل کړې وې.
په تېرو نږدې دوو کلونو کې د هېواد د بېلابېلو ولایتونو اوسېدونکو په خپل شخصي لګښت د سړکونو، ښوونځیو او روغتونونو رغېدو اړوند او یوشمېر نورې ټولګټې پروژې پلې کړې دي.
