د پکتیا ولایت د اطلاعاتو او کلتور رییس خالقیار احمدزی وایي، بېګاه د دغه ولایت په جانيخېلو ولسوالي کې د اورښتونو له امله د یوه کور چت را لوېدلی او د یوې کورنۍ پنځه کسان پهکې مړه شوي دي.
د نوموړي په وینا، پېښه د جانيخېلو ولسوالي، د بلخېلو په ګړیجن کلي کې شوې ده. احمدزی زیاتوي چې په مړو شویو کسانو کې یو ماشوم، یوه مېرمن او درې نجونې شاملې دي.
په دې وروستیو کې د هېواد بېلابېلو ولایتونو کې سخت بارانونه وشول او سېلابونه راووتل چې له کبله یې سلګونو کسانو ته مرګژوبله واړوله. دغو سېلابونو د خلکو زرګونه کورونه او زرګونه جریبه کرنیزې ځمکې هم یووړې.
