فاریاب کې یوشمېر کروندګر وايي چې د تېر ژمي پر مهال د ورښتونو کمښت له امله دغه ولایت کې وچکالي ډېره شوې او کښتونه یې د لهمنځه تلو ګواښ سره مخ دي.
د فاریاب یوه کروندګر حمیدالله سلاموطندار ته وايي چې ژوند یې پر کرنه او مالدارۍ ولاړ دی او سږکال یې د وچکالۍ په دلیل حاصلات سوځېدلي چې سخت یې اندېښمن کړي دي.
د سلاموطندار پښتو فېسبوکپاڼه وڅارئ
دوی زیاتوي چې د وروستیو څو پرلهپسې کلونو راهیسې د وچکالۍ څپې سره مخ دی او په وینا یې، هر څه چې کري، لهمنځه ځي او کښت کړي غنم یې ښه حاصل نه ورکوي.
نوموړي وویل: «سږکال مو غنم وکرل، وسوځېدل، څه وکړو ستونزې ډېرې دي. په کروندو کې بوخت یو او ګوډ هم یم. غنم سږکال ونه شول او د اقتصادي ستونزو له امله لوګري نشو اچولی. زه یې خپله لو کوم. څلور پنځه کال کېږي وچکالي ده او حاصلات سوځوي.»
په ورته مهال د فاریاب یوه بل کروندګر ۶۵کلن تاجمحمد وویل چې پر ۵۰ هکټاره ځمکه یې غنم کرلي و چې د وچکالي له امله لهمنځه لاړل او ډېر زیانونه وراوښتي دي.
نوموړي وویل: «۲۰۰ من غنم مې کرلي، خدای خبر چې ۵۰ منه به هم حاصل ورکړي، که نه، ځکه حاصلات سوځېدلي او یوازې واښه یې ترلاسه کوو. د پالیزو لپاره مې درې ځله ځمکه قولبه کړه، خو د وچکالي له امله هغه هم سږکال نه کېږي.»
د فاریاب د کرنې، اوبو لګولو او مالدارۍ ریاست مسوولان بیا سږنۍ وچکالي د نورو کلونو په پرتله د اندېښنې وړ بولي. د فاریاب د کرنې، اوبو لګولو او مالدارۍ ریاست د ترویج مدیر غلامفاروق وویل: «وچکالي په ټولییزه توګه د دغه ولایت کروندګر ګواښي، ځکه د خلکو عاید کرنې پورې تړلی او له بدهمرغه چې سږکال یې کروندګر ډېر ځپلي دي.»
د فاریاب د کرنې ریاست د ترویج مدیر زیاتوي چې د یاد ولایت په ځینو ولسوالیو کې کښتونه په بشپړه توګه او ځینو نورو کې بیا ۹۰سلنه لهمنځه تللي دي.
نوموړي وویل: «شاوخوا ۱۶۰زره هکټاره ځمکو باندې للمي او اوبهییز غنم کرل شوي و چې ډېری سیمو کې للمي په بشپړه توګه لهمنځه تللي، لکه د اندخوی څلورګونو ولسوالیو کې، د شتونکوټ شمالي برخو کې ۹۰سلنه، سوېلي سیمې بیا غنیمت دي، بلچراغ ولسوالي کې ۹۵سلنه، قیصار کې ۹۵سلنه او اساسي ستونزه اوبه دي.»
دا په داسې مهال دی چې د فاریاب ډېری ځمکې للمي دي او د یاد ولایت ۸۵سلنه اوسېدونکي پر کرنه او مالدارۍ بوخت دي، خو ګڼشمېر یې د وچکالۍ له امله کرنه پرېښي او نورو هېوادونو ته د کار په لټه وتلي دي.
